Пентагон Кобулда 29 август куни ўзи берган авиазарба юзасидан изоҳ берди, деб ёзади «РБК».

Фото: Reuters

Нишон ИШИДнинг мина жойлаштирилгани гумон қилинган автомобили бўлган. Зарба натижасида портлаш содир бўлган. Ҳарбийлар ҳужумни Кобул аэропортига нисбатан таҳдид билан изоҳлади.

Ҳужум дрон ёрдамида амалга оширилган. Пентагонда маълум қилишларича, тинч аҳоли орасида қурбонлар йўқ.

Ariana News гувоҳларга таяниб ёзишича, ракета турар жойга келиб тушганидан кейин олти киши, шу жумладан, тўрт бола ҳалок бўлган, яна тўрт киши яраланган. Ракета зарбаси оқибатида уйнинг бир қисми вайрон бўлган, шунингдек, иккита машинага зарар етган.

Ракета Кобул аэропорти атрофларига келиб тушгани, натижада портлаш юз бергани ҳақида аввалроқ маълум қилинганди. Дастлаб икки қурбон ва уч ярадор ҳақида маълум қилинган. Бироздан кейин Reuters АҚШ Кобулдаги ИШИД террорчиларини нишонга олганини хабар қилди.

Кейинроқ Америка дрони билан берилган зарба оқибатида тўққиз киши ҳалок бўлгани маълум қилинди. Қурбонларнинг барчаси битта оила аъзолари бўлган, уларнинг олти нафари — болалар, энг кичиги икки ёшда бўлган.

АҚШ Марказий қўмондонлиги авиазарбалар оқибатида тинч аҳоли орасидаги эҳтимолий талафотларни ҳисоблаб чиқаётганини маълум қилди. Талафотларни улар Америка дрони нишонига айланган машинада катта миқдрода портловчи модда бўлгани билан боғламоқда.

Ҳалок бўлганларнинг қариндоши аниқлик киритишича, воқеа жойида иккита автомобиль — Toyota Corona ва Toyota Camry бўлган, қурбонлар шуларнинг бирида ўтирган.

Бу ҳокимият тепасига «Толибон» келганидан кейин АҚШ томонидан олиб борилган эвакуация фонида Кобул аэропорти яқинида содир бўлган портлашдан кейин америкалик ҳарбийлар берган иккинчи авиазарбадир.

ИШИД теракт учун жавобгарликни ўз зиммасига олганди. АҚШ президенти Жо Байден разведкага таяниб маълум қилганидек, ҳужум ортида ИШИДнинг Афғонистон ва Покистондаги ячейкаси — «Хуросон вилояти ислом давлати» турибди. Байденнинг сўзларига кўра, улар ҳужум учун жавоб беради.

Портлашдан кейин АҚШ ҳарбийлари Афғонистонда дрон ёрдамида ИШИДга зарбалар берди ва террорчиларнинг икки етакчисини йўқ қилди.

Мавзуга доир: