30 август куни Ўзбекистон ташқи ишлар вазири Абдулазиз Комилов Тошкент шаҳрига ташриф билан келган Германия ташқи ишлар вазири Хайко Маас билан учрашув ўтказди, деб хабар беради вазирлик матбуот хизмати.
Маълум қилинишича, мулоқот чоғида Ўзбекистон–Германия ҳамкорлигининг долзарб масалалари муҳокама қилинган, бўлажак қўшма тадбирлар жадвали ва кун тартиби кўриб чиқилган.
Шунингдек, Афғонистондаги бугунги вазиятга алоҳида эътибор қаратилган. Хайко Маас Ўзбекистон томонига Афғонистондан Германия ва бошқа хорижий давлатлар фуқароларининг эвакуациясини ташкиллаштиришда кўрсатган ёрдами учун яна бир бор миннатдорлик билдирган. Томонлар Афғонистон йўналишида яқин ҳамкорликни давом эттиришга тайёрлигини маълум қилди.
«Учрашувда икки мамлакатнинг халқаро ва минтақавий ташкилотлар доирасидаги ҳамкорлиги юзасидан ҳам фикр алмашилди», — дейилади хабарда.
Аввалроқ Абдулазиз Комилов Япония ташқи ишлар вазирининг парламентар ўринбосари Сатоши Наканишини қабул қилгани, Абдулазиз Комилов Покистон ташқи ишлар вазири Шоҳ Маҳмуд Қурайший билан учрашув ўтказгани тўғрисида хабар берилганди.
Изоҳ (0)