Шавкат Мирзиёев 27 август, жума куни Навоий вилоятига жўнаб кетганди. Президент Навоий вилоятига сафарини Кармана туманидан бошлади.
Давлат раҳбари матбуот котибининг хабар беришича, шу куни вилоятнинг Кармана туманида «яшил энергетика»га ўтиш йўлидаги биринчи қадам бўлмиш қуввати 100 мегаватт бўлган замонавий қуёш фотоэлектр станцияси ишга туширилмоқда.
Президент буни Ўзбекистон саноати тарихида жуда катта воқеа деб атади — 110 миллион доллар инвестициялар ўзлаштирилиб, 300 мингта қуёш панеллари ўрнатилган. Лойиҳа доирасида қисқа муддатда — бир ярим йил ичида катта ҳажмдаги ишлар бажарилган.
Бу ерда йилига 252 миллион киловатт-соат электр энергияси ишлаб чиқарилади. Бунинг ҳисобига 80 миллион куб метр табиий газ тежалиб, атмосферага 160 минг тонна буғланувчи газлар чиқишининг олди олинади.
Ушбу лойиҳа БААнинг Masdar компанияси томонидан амалга оширилган бўлиб, бу хорижий давлат компаниялари билан ҳамкорликдаги айни пайтдаги энг йирик лойиҳадир.
Шунингдек, қайд этишича, давлат раҳбари Амирликлар билан ўзаро ҳамкорлик йилдан йилга кенгайиб, янги босқичга кўтарилиб бораётганини алоҳида таъкидлади.
Биргина энергетика соҳасида умумий қиймати қарийб 1,5 миллиард доллар бўлган 1 минг 700 мегаваттли 6 та лойиҳани амалга ошириш бошланган. Жумладан, Навоий вилоятининг ўзида 2023 йилда Masdar компанияси билан ҳамкорликда 500 мегаваттли шамол станцияси ва Phanes group иштирокида 200 мегаваттли қуёш станцияси барпо этилади.
Президент Бирлашган Араб Амирликлари ҳукумати вакилларига, Masdar компанияси раҳбари Муҳаммад Жамил Ал-Рамаҳий ҳамда қурилишда иштирок этган 600 дан ортиқ хорижий ва маҳаллий мутахассисларга чуқур миннатдорлик билдирди.
Эслатиб ўтамиз, Masdar (БАА) компанияси 2019 йил 18 октябрь куни Scaling Solar 1 лойиҳаси доирасида Навоий вилоятида қуввати 100 МВт бўлган ФЕС қурилиши бўйича ўтказилган тендерда ғолиб бўлган эди.
Изоҳ (0)