Германия Ҳарбий ҳаво кучларига тегишли самолёт Ислом Каримов номидаги халқаро аэропортга қўнишни амалга оширди. Бу ҳақда Telegram’даги «Новости Ташкентского неба» канали хабар берди.
Маълум қилинишича, Airbus А-400М Атлас самолёти Кобул—Тошкент йўналиши бўйича сўнгги гуманитар рейсини амалга оширган. Германия ҳукумати Афғонистондаги фуқароларни олиб чиқиш операцияларини хавфсизлик нуқтаи назаридан тўхтатганини эълон қилди.
Эслатиб ўтамиз, 17 август куни Германия Қуролли Кучларининг (бундесвер) иккинчи эвакуация самолёти 125 нафар йўловчи билан Афғонистондан Тошкентга учиб келган. Самолёт Кобулдан ҳавога кўтарилиши билан Германия Мудофаа вазирлиги Twitter’даги саҳифасига Airbus А400М Кобулдан Тошкентга қайтаётгани ҳақида хабар қилган.
Хабарда, бортда Германия фуқаролари, маҳаллий афғон ходимлари ҳамда «ҳимояга муҳтож бошқа шахслар» борлиги таъкидланган. «Авиаташувлар бошланди ва бу хавфсизлик билан боғлиқ вазият тақозо этгунига қадар давом этади», — деб ёзганди Германия ташқи ишлар вазири Хайко Мас.
Германия мудофаа вазири Аннегрет Крамп-Карренбауэр эса Афғонистондан амалга оширилаётган эвакуация хавфли миссия экани, бироқ бундесверда малакали ходимлар борлигини маълум қилган. Германия 22 август кунига қадар Тошкент орқали Афғонистондан 2 мингдан ортиқ фуқарони эвакуация қилди.
Изоҳ (0)