Андижон вилоятида 2021 йилнинг ўтган олти ойи давомида содир бўлган йўл-транспорт ҳодисалари оқибатида 49 киши вафот этган, 284 нафар фуқаро эса турли даражада тан жароҳати олган. Бу ҳақда вилоят ЙҲХБ ахборот хизмати маълумотига таяниб, «Дарё» мухбири хабар берди.
Маълум қилинишича, 2021 йилда йўл-транспорт ҳодисалари ва уларнинг оқибатида жабрланганлар сони ўтган йилнинг шу даврига нисбатан ошган. Жорий йилнинг олти ойи давомида 333 та йўл-транспорт ҳодисаси содир этилган бўлиб, оқибатда 49 киши вафот этган, шунингдек, 284 нафар фуқаро турли хил оғир тан жароҳати олиб, шифохонага ётқизилган. Натижада ЙТҲлар 118 фоизга, вафот этганлар 11,4 фоизга, турли тан жароҳатлари олганлар эса 113 фоизга ошган.
Қайд этилишича, 2020 йилнинг олти ойи давомида Андижонда 215 та йўл-транспорт ҳодисаси юз берган бўлиб, оқибатда 44 киши вафот этган. 171 нафар фуқаро эса турли даражадаги жароҳати олиб, шифохонага ётқизилган.
«ЙТҲларга ҳайдовчиларнинг йўлларда йўл ҳаракати қоидалари талабларига ва белгиланган тезликка риоя қилмаслиги сабаб бўлмоқда. Бундай салбий ҳолатларнинг олдини олиш борасида вилоят Йўл ҳаракати хавфсизлиги бошқармаси томонидан йўлларда ходимларнинг хизмат олиб боришлари ташкил этилмоқда. Бироқ бутун шахсий таркиб билан вилоят ҳудудидаги барча йўлларни қамраб олиш ҳамда йўл-патруль хизмати ходимларининг хизматини ташкил этиш ва назоратини олиб бориш имкони бўлмаганлиги инобатга олиниб, автоматик онлайн тарзда ишловчи ҳамда тезликни аниқлаш имкониятига эга фото-видео фиксацияли камералар ўрнатилмоқда. Шу кунга қадар бошқарма тасарруфида 10 та мултирадар ва 4 та Autocon қурилмалари мавжуд эди. Куни кеча вилоят ҳокимлиги ёрдами билан яна бир дона Autocon тезликни ўлчаш мосламаси келтирилди. Шу билан бошқарма ихтиёрида бундай русумдаги мосламалар сони 5 тага етди. Мана шундай замонавий тезликни ўлчаш ускуналари юз бериши мумкин бўлган нохуш ҳолатларнинг олдини олишга хизмат қилиши, шубҳасиз», — дейди вилоят Йўл ҳаракати хавфсизлиги бошқармаси бошлиғи Саидолим Зингиров.
Аввалроқ Андижонда сўнгги 3 йилда неча нафар ҳайдовчи тезликни ошириб, фоторадарларга тушгани маълум қилинганди.
Изоҳ (0)