Ўзбекистон шаҳарларида суғориш тизими қониқарли эмас. Бу ҳақда Шавкат Мирзиёев раислигида ўтказилаётган йиғилишда давлат раҳбари сўз юритди, дея хабар бермоқда «Дарё» мухбири.
«Октябрь–ноябрь ойларида 55 миллион дона, келгуси йил баҳор мавсумида автомобиль йўллари, дала четлари, барча аҳоли масканларида 70 миллион дона тут, павловния, мевали ва манзарали дарахтлар, шунингдек, тез ўсувчи ва бошқа кўчатларни экилиши шарт.
Қорақалпоғистон, Қашқадарё, Жиззах ва Сурхондарё – 11 миллиондан, Андижон, Бухоро, Навоий, Самарқанд ва Фарғона – 10 миллиондан, Наманган, Тошкент вилояти ва Хоразм – 9 миллиондан, Сирдарё – 7,5 миллион, Тошкент шаҳрида – 1,1 миллион туп кўчат экилиши зарур.
Мисол учун, Чироқчи туманидан ўтувчи Самарқанд–Қарши магистрал йўлининг 35 километр узунликдаги қисмининг ҳар икки томонида томчилатиб суғориш йўли билан 30 минг туп манзарали дарахт экилган.
Ушбу дарахтларни парваришлаш учун Жамоат ишлари жамғармаси ҳисобидан 140 нафар маҳаллий аҳоли жалб қилинган. Натижада экилган дарахтларнинг 90 фоизи кўкарган. Ёки Самарқанд шаҳридаги 75 километр шаҳар ирригация тизимини қайта тиклаш орқали сўнгги 2 йилда дарахтларнинг қуриб қолиши 90 фоизга камайган ҳамда шаҳардаги ҳаво ҳарорати 2 даражага пасайган», — деди давлат раҳбари.
Президентнинг қайд этишича, бошқа ҳудудларда экилаётган дарахтлар парвариш қилинмагани ёки суғориш тизими издан чиққани боис 60-70 фоиз дарахтлар қуриб қолмоқда.
«Мисол учун, Нукус шаҳрида – 70 фоиз, Навоий шаҳрида – 65 фоиз, Наманган ва Фарғона шаҳарларида – 60 фоиз ирригация тармоқлари ишдан чиққан. Айниқса, Тошкент шаҳри туманлари, вилоят марказлари ва йирик шаҳарларда дарахтлар ва экинлар маҳаллий иқлимни инобатга олмасдан, пала-партиш экилаётгани боис кундан кунга қуриб боряпти.
Туман ҳокимлари ободонлаштириш ва кўкаламзорлаштириш ишларини ўз ҳолига ташлаб қўйган, шаҳар кўчалари чиқиндига тўлиб кетгани билан ҳеч кимнинг иши йўқ. Қани туман ҳокими, қани сектор раҳбари?», – деди Шавкат Мирзиёев.
Изоҳ (0)