Президент Шавкат Мирзиёев раислигида ўтказилган йиғилишда давлат раҳбари чиқиндиларни йиғиш ва қайта ишлаш бўйича масъулларга йил якунига қадар йўл қўйилган қолоқликларни бартараф этиш шартлигини таъкидлади. Бу ҳақда «Дарё» мухбири хабар бермоқда.
«Чиқиндиларни йиғиш ва қайта ишлаш бўйича И.Боқижонов ва вилоят ҳокимлари шахсан шуғулланиб, йил якунига қадар йўл қўйилган қолоқликларни бартараф этишлари шарт. Мисол учун, Наманган шаҳри, Тўрақўрғон, Мингбулоқ ва Наманган туманларида хусусий шериклик тизими тўлиқ ўзини оқлаган.
Жумладан, ушбу ҳудудларда аҳолини санитар тозалаш хизматлари билан қамраб олиш даражаси, ўтган 6 ойда 79 фоиздан 92 фоизга етиб, тушумлар 2 бараварга ошган. Ёки Фарғонада ҳам хусусий шериклар томонидан 7 миллиард сўмлик инвестиция жалб қилиниб, водийда илк бор чиқиндиларни саралаш заводи ишга туширилган.
Энди ҳудудларда чиқинди масаласи билан вилоят ҳокимлари шахсан шуғулланади, сўров ҳам улардан бўлади. Шу боис хусусий шериклик бўйича тендер комиссияларига вилоят ҳокимлари раҳбарлик қилади.
Вилоят ҳокимлари И.Боқижонов, Ишметов билан бирга, 1 октябрга қадар хусусий шериклик асосида 30 та, йил якунига қадар яна 24 та лойиҳани бошласин», – деди Шавкат Мирзиёев.
Изоҳ (0)