Samarqanddagi tibbiyot muassasalari 9,2 milliard so‘mlik dori vositalariga muqobil tijorat takliflari mavjud bo‘lgani holda, 14 milliard 902 million so‘mga, ya’ni 5 milliard 643 million so‘m qimmat narxlarda xarid qilingani aniqlandi. Bu haqda Korrupsiyaga qarshi kurashish agentligi ma’lum qildi.
Qayd etilishicha, ushbu holat agentlikning Samarqand viloyat sog‘liqni saqlash boshqarmasi va uning quyi tizimlarida “Korrupsiyasiz soha” loyihasi doirasida budjet mablag‘lari, davlat aktivlarini realizatsiya qilish va davlat xaridlari sohasida qonun hujjatlariga rioya etilishi holati bo‘yicha o‘tkazilgan o‘rganishda aniqlangan.
O‘rganishda 4,9 milliard so‘mlik tender va 186,1 million so‘mlik elektron do‘kon shaklidagi xaridlar qonun talablariga zid ravishda tashkil qilingani ham ma’lum bo‘lgan.
Ushbu holatlar yuzasidan Samarqand viloyat prokuraturasi tomonidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan 2 ta jinoyat ishi qo‘zg‘atilgan.
Eslatib o‘tamiz, 2-iyul kuni “Davlat xaridlari shaffofligini ta’minlash va samaradorligini oshirishga doir qo‘shimcha chora-tadbirlar to‘g‘risida”gi Prezident qarori qabul qilindi. Qaror bilan Davlat xaridlari ochiq va shaffof amalga oshirilishini ta’minlash bo‘yicha respublika komissiyasi to‘g‘risidagi nizom tasdiqlangan.
Shu bilan birga, davlat xaridlarini amalga oshirish jarayonlari alohida tartibda nazorat qilinadigan ayrim korporativ va budjet buyurtmachilari ro‘yxati ham tuzilgan. Ushbu ro‘yxatda Sog‘liqni saqlash vazirligi ham o‘rin olgan.
Izoh (0)