Xiaomi компанияси смартфонларидаги муаммолар сабаб фойдаланувчиларидан узр сўраб чиқди. Бу ҳақда Хитойнинг MyDrivers нашрига таяниб, Hi-Tech.Mail.ru хабар берди.
Узр Xiaomi MIUI бош менежери Жин Фан иштирок этган матбуот анжуманида янграган. Унинг сўзларига кўра, компания истеъмолчилар олдида смартфонлар учун чиқарилган MIUI 12 операцион тизими кўплаб нуқсонларга эгалиги ва охирига қадар оптималлаштирилмагани сабаб айбдор.
Шу сабабли Фан Xiaomi компанияси MIUI 13 ни эртароқ тақдим этишдан бош тортаётганини, чунки тизимни яхшилаб текшириш кераклигини маълум қилган. Корпорация топ-менежери, шунингдек, компания мутахассислари MIUI 12 даги асосий муаммоларни қайд этганини ва янгиланган MIUI 12.5 тақдим этилганини билдирган.
Xiaomi маълумотларига кўра, MIUI 12.5 да тизим билан боғлиқ жами 160 та муаммо ва ички дастур ҳамда сервисларга алоқадор 224 та камчилик бартараф этилган. MIUI 12.5 операцион тизимига эга бўладиган дастлабки смартфонлар партиясидан 12 модель ўрин олади. Масалан, яқинда тақдим этилган Xiaomi Mi Мix 4, Mi 11 Ultra, Мi 10 ва бошқа девайслар.
Xiaomi компанияси сўнгги бор бренд ишқибозларидан 2020 йилнинг февралида узр сўраб чиққанди. Ўшанда компания Android’нинг янгиланган версияси тақдимоти кечикканига изоҳ бериб, муаммо коронавирус инфекцияси тарқалгани сабаб юзага келтирганини тушунтирган эди.
Изоҳ (0)