«Ўзбекнефтгаз» АЖ бошқаруви раиси Меҳриддин Абдуллаев бошчилигидаги ишчи гуруҳ аъзолари инвестицион лойиҳа доирасида амалга оширилаётган қурилиш-монтаж ишларининг якуний босқичи ҳолатини ўрганиш ҳамда келгуси вазифаларни муҳокама этиш мақсадида Uzbekneftegaz GTL заводида бўлди.
Бошқарув раиси бунёдкорлик, қурилиш-таъмирлаш ишлари билан яқиндан танишиб, қурилиш ишларининг сифатини янада ошириш, яхши натижаларга эришиб, самарадорликни юқори даражага кўтариш, технологик ҳудудларда ишга тушириш олди ишлари бўйича таклиф ва кўрсатмаларни берди.
Шунингдек, масъулиятсизлик билан нуқсонли материаллардан ва конструкциялардан фойдаланишга мутлақо йўл қўймаслик, ишчи ходимларнинг ҳаёти, соғлиғига зарар етказилиши мумкин бўлган омилларни бартараф этиш борасида топшириқлар берилди.
Бундан ташқари, қурилиш майдонининг ўзи ва унга бевосита ёндош бўлган жойда қурилиш-монтаж ишларини жойида ўрганиш мақсадида, бошқарув раиси даставвал заводнинг маъмурий биносида бўлди ҳамда бу ерда олиб борилаётган сўнгги пардозлаш ишларини кўздан кечириб, мавжуд муаммолар юзасидан эътирозларини билдириб ўтди.
Аниқ мисоллар билан кўрсатилган камчиликларни қисқа муддатда бартараф этиш ҳамда қурилиш ишларининг сифатли бажарилиши, лойиҳа талабларига амал қилиниши, белгиланган ишларни ўз вақтида якунлаш бўйича мунтазам назорат ишлари олиб борилиши кераклиги белгилаб берилди.
Эслатиб ўтамиз, лойиҳанинг бош пудратчилари Кореянинг Hyundai Engineering, Hyundai Engineering&Construction ҳамда Enter Engineering (Сингапур) консорсиуми томонидан заводда ускуналарни ишга тушириш ишлари фаол суръатларда олиб борилмоқда.
Ишга тушириш, созлаш олди ва созлаш ишларини бажаришда ҳозирги кунда 500 донадан зиёд техника жалб этилган бўлиб, қурилиш майдонида 9 мингдан ортиқ киши меҳнат фаолиятини давом эттирмоқда.
Uzbekneftegaz GTL заводи ишга тушгач, йилига 3,6 миллиард куб метр тозаланган табиий газ (метан) қайта ишланади ва 1,5 миллион тонна юқори сифатли синтетик суюқ ёқилғи, жумладан, 307 минг тоннадан ортиқ авиакеросин, 724 минг тонна дизель ёқилғиси, 437 минг тонна нефть, кимё соҳаси учун хомашё бўлган нафта, 53 минг тонна суюлтирилган газ ишлаб чиқарилишига эришилади.
Шу сабабли, бошқарув раиси Марказий Осиёдаги энг йирик лойиҳалардан бири бўлган заводда энг замонавий ускуналар билан жиҳозланган қурилмаларни бошқариш ҳам кадрлардан катта малака талаб қилишини таъкидлаб, мутахассисларни тайёрлаш, қайта тайёрлаш ишларини ташкил этиш, GTL синтетик суюқ ёқилғи ишлаб чиқариш мажмуасида ўрнатилган оловли печларни хавфсиз ишлатиш бўйича компания муҳандис ва техник мутахассислари билимларини ошириш кераклигини таъкидлади.
Айтиш жоизки, технологик жараёнлар билан бир қаторда заводнинг кадрлар захирасини истиқболли ёш мутахассислар билан тўлдириш мақсадида маҳаллий ва хорижий олий таълим муассасалари билан кадрлар тайёрлаш бўйича ҳамкорлик алоқалар йўлга қўйилди.
«Ўзбекнефтгаз» АЖнинг GTL заводи учун кадрларни тайёрлаш дастури доирасида Бухоро нефтни қайта ишлаш заводи ва Uzbekneftegaz GTL заводи ўртасида кадрларни тайёрлаш бўйича келишув имзоланди.
2017—2021 йиллар давомида Бухоро нефтни қайта ишлаш заводининг ишлаб чиқариш цехлари ва объектларида жами 160 нафар саралаб олинган ёш мутахассис, шу жумладан, республиканинг нефть ва газ соҳасидаги олий ўқув юртларининг энг яхши битирувчилари амалий-назарий машғулотларни ўташди. Уларга GTL заводида ишлаб чиқариш амалиётини ўташ, Uzbekneftegaz GTL компаниясида малака ошириш ҳамда ўқишининг сўнггида ўз мутахассислиги бўйича GTL заводида иш билан таъминлаш белгиланди.
Имтиҳонлар натижасига кўра, бугунги кунга қадар барча 160 нафар мутахассис ўз иш фаолиятини давом эттириш учун Uzbekneftegaz GTL заводида иш бошлади.
Заводда иш бошлаган маҳаллий мутахассислар малакасини янада ошириш, хорижий тажрибани амалда қўллаш учун Канада давлати фуқароси бўлган, тажрибали мутахассис Марсель Юрген Краузе заводнинг техник директори лавозимига тайинланди.
Бошқарув раиси топшириғига асосан, Oryx GTL заводида ўн йил техник менежер бўлиб ишлаган, нефть ва газни қайта ишлаш, нефть-кимё саноатида жами 33 йиллик юқори тажрибага эга бўлган Марсель Краузе заводни ишга тушириш, уни лойиҳа қуввати билан таъминлаш, созлаш ишларини мувофиқлаштириш борасида ўз билим ва кўникмаларини ёш мутахассисларга ўргатиб келмоқда.
Ишчи гуруҳ томонидан ўз навбатида, ёнилғи газини қабул қилиш, сувни совутиш қурилмаси (градирня), хом сувни қайта ишлаш қурилмалари — минералсиз сув ишлаб чиқариш ҳамда ёнғин ўчирув сув тизимининг ишлаш фаолияти ҳам назорат қилинди.
Амалга оширилган ишлар ҳолатини ўрганиш даврида, ишга туширилган бош подстанция ва завод ташқи тизимдан электр энергиянинг қабул қилиниши, марказий бошқарув пульти, машъала тизими ҳамда буғ ишлаб чиқариш котеллари, назорат ўлчов, автоматика тизими борасида ҳам топшириқлар берилди.
«Ўзбекнефтгаз» АЖ матбуот хизмати
Изоҳ (0)