Ўзбекистоннинг Афғонистон билан давлат чегарасини қўриқлаш ва ҳимоя қилиш кучайтирилган тартибда олиб борилмоқда. Бу ҳақда Ўзбекистон Ташқи ишлар вазирлиги расмий вакили Юсуп Кабулжонов 15 август куни маълум қилди.
14 август куни Афғонистон шимолидаги Мозори-Шариф шаҳри «Толибон» назорати остига ўтгани маълум бўлган. Шаҳарни деярли жангсиз «Толибон»ларга топширган афғон мудофаа ва хавфсизлик кучлари Ўзбекистон билан чегара томон чекинган, Афғонистонни Ўзбекистоннинг Термиз шаҳри билан боғлаб турувчи «Дўстлик» кўприги афғонистонликлар билан тўлган. Сўнгги маълумотларга кўра, Ўзбекистон уларнинг 84 нафарини қабул қилган.
ТИВ расмий вакили Юсуп Кабулжоновнинг маълум қилишича, 14 августда кун давомида Термиз—Мозори-Шариф темир йўл участкасида хизмат кўрсатувчи Ўзбекистон фуқароларини ватанга қайтариш ташкил этилган. ТИВ расмийсининг баёнотида Афғонистонда қолаётган бўлиши мумкин бўлган бошқа ўзбекистонликлар ҳақида маълумот берилмаган. Қайд этиш жоиз, 14 август куни Кобулдан Тошкентга Афғонистондаги беқарорлик бошланганидан бери энг катта авиарейс келган эди.
Таъкидлаш жоизки, давлат чегарасини қўриқлаш ва ҳимоя қилиш кучайтирилган тартибда олиб борилмоқда, барча зарур хавфсизлик чоралари кўрилган. Термизда хавфсизлик идоралари раҳбарлари ва давлат ҳокимияти органлари вакилларидан иборат тезкор штаб жойлаштирилган, — дейилади ТИВ расмий вакили Юсуп Кабулжановнинг ахборотида.
Изоҳ (0)