Афғонистон ҳукумати зўравонликни тугатиш эвазига «Толибон»га мамлакатни бошқаришда иштирок этишни таклиф қилди. Бу ҳақда Al Jazeera телеканали ҳукуматдаги манбага таяниб хабар берди. «Толибон» бу таклифга жавоб берганми ёки йўқ, ҳозирча номаълум. Аммо, аввалроқ Покистон бош вазири Имрон Хоннинг маълум қилишича, «Толибон» етакчилари Ашраф Ғани президентликдан кетмас экан, Афғонистон ҳукумати билан музокара қилмаслигини айтган.
Покистон ҳукумати раҳбари бу ҳақда Reuters’га берган интервьюсида айтиб ўтган. Хоннинг сўзларига кўра, ҳозирги шароитда Афғонистонни сиёсий йўл билан тартибга солиш қийин. Май ойидан буён «Толибон» хорижий армия бўлинмалари чиқиб кетиши муносабати билан бутун мамлакат бўйлаб кенг кўламли ҳужумлар уюштирмоқда.
«Уч-тўрт ой олдин, ҳаракатнинг юқори раҳбарияти бу ерга келганида мен ‘Толибон’ни тинчлик музокаралари ўтказиш зарурлигига ишонтиришга ҳаракат қилдим», — деди Хон Исломободдаги уйида берган интервьюсида.
«‘Толибон’нинг шарти шундаки, Ашраф Ғани президент бўлиб турган экан, улар Афғонистон ҳукумати билан музокара қилмоқчи эмас», — дея Хон ҳаракат етакчиларининг сўзларини келтирди.
Ғани ва унинг ҳукуматини АҚШ қўғирчоқлари деб ҳисоблайдиган «Толибон» билан Кобул тайинлаган бир гуруҳ афғон музокарачилари ўртасида тинчлик музокаралари 2020 йилнинг сентябрь ойида Қатар пойтахти Доҳада бошланган, аммо бу борада унчалик ютуққа эришилмаган. Бир қатор давлатлар, жумладан АҚШ вакиллари ҳозир Доҳада, у ерда 10 августдан бери Афғонистондаги қуролли можарони ҳал қилиш бўйича уч кунлик маслаҳатлашувлар ўтказилмоқда.
Шу билан бирга, афғонистонлик сиёсатчилар «Толибон»нинг ҳозирги ҳужуми ортида Покистон турганини бир неча бор таъкидлаган.
Улар Афғонистонда давом этаётган ҳарбий ҳаракатларни қўшни давлатнинг «воситачилик уруши» деб атаган. Канаданинг Покистондаги собиқ элчиси Крис Александр ҳам шундай фикр билдирди. Александр ижтимоий тармоқлардаги #SanctionPakistan кампаниясининг фаол иштирокчиси, кампания «Толибон» тарафида Афғонистон ички ишларига аралашгани учун Покистон ҳукуматига қарши халқаро санкцияларни талаб қилади.
Покистон, ўз навбатида, «Толибон»ни қўллаб-қувватлаётгани ҳақидаги даъволарни рад этди.
Айни пайтда Афғонистонда ҳукумат кучлари учун вазият ёмонлашишда давом этмоқда. 12 августга ўтар кечаси улар Кобулдан 150 километр жанубда жойлашган, Ғазни вилоятининг маъмурий маркази — Ғазни шаҳрини қўлдан чиқарди. 11 август куни «Толибон» Қундуз четидаги аэропортда бир неча кун мудофааланиб турган Афғонистон армияси корпусини таслим қилди. Ҳарбийлар жангариларга қурол ва оғир техникаларни, шу жумладан, вертолётни топширди. Бугунги кунга келиб, «Толибон» 10 та вилоят маъмурий марказини назорат қилмоқда.
Россия мудофаа вазири Сергей Шойгунинг сўзларига кўра, Афғонистондаги ҳозирги вазият «совет қўшинлари мамлакатдан чиқарилгандан кейинги» вазиятдан анча мураккаб.
АҚШ ҳарбийлари ҳам вазиятни оғир деб баҳоламоқда, аввалроқ АҚШ Мудофаа вазирлиги вакили «Толибон» 90 кун ичида Кобулни эгаллаши мумкинлигини айтган.
Изоҳ (0)