Қашқадарёда 1217 нафар тадбиркор муаммога дуч келганини айтиб, Президентга мурожаат йўллагани маълум қилинди
Президент Шавкат Мирзиёев тадбиркорлар билан мулоқот қилишини маълум қилгач, 1217 нафар қашқадарёлик тадбиркор давлат раҳбарига мурожаат йўллади, дея хабар берди «Дарё» мухбири.
Таъкидланишича, давлат раҳбарига шикоят қилган қашқадарёлик тадбиркорлар 501 та ҳолатда кредит билан боғлиқ муаммога дуч келаётганини маълум қилган.
«Президентимиз тадбиркорлар билан мулоқот қилишини маълум қилгач, 103 нафар деҳқонободлик тадбиркор давлат раҳбарига мурожаат йўллаб, муаммога дуч келаётганини маълум қилган. Сектор раҳбарлари билан бирга тадбиркорлар билан учрашувга тайёргарликнинг бориши бўйича ўтказилган йиғилишдаги топшириққа кўра, шу тадбиркорлар билан мулоқот қиляпмиз. Туманда ечилиши мумкин бўлган муаммоларга ечим топяпмиз», — дейди Деҳқонобод тумани ҳокими Зоир Алиқулов.
«Дарё» мухбирининг аниқлаштиришича, Президентга Қашқадарёнинг Деҳқонобод туманидан 103 нафар тадбиркор мурожаат қилган бўлса, Қарши шаҳридан 174 нафар, Шаҳрисабз шаҳридан 38 нафар, Ғузор туманидан 53 нафар, Касбидан 89 нафар, Китобдан 61 нафар, Косондан 68 нафар, Қарши туманидан 97 нафар тадбиркор шикоят йўллаган.
Эслатиб ўтамиз, аввалроқ Президентнинг тадбиркорлар билан очиқ мулоқоти август ойининг бошида бўлиб ўтиши ва шу сабаб таклифлар 31 июлгача қабул қилиниши айтилганди. Кейинроқ тадбиркорларнинг Шавкат Мирзиёевга мурожаатларини қабул қилиш муддати 10 августга қадар узайтирилди. Ушбу тадбирда тадбиркорлар олдидаги долзарб муаммолар ва уларнинг ечимлари, республикада бизнес муҳитини янада яхшилаш бўйича таклиф ва ташаббуслар муҳокама қилинади. Шавкат Мирзиёев 9 август куни тадбиркорлар билан учрашувга тайёргарликнинг бориши бўйича йиғилиш ўтказди.
Мавзуга доир:
