Йигитали Мамажонов нима учун Райҳоннинг уйида яшашга рози бўлгани ва «ҳозир қайнатасининг уйида яшайди» деган гап-сўзларга ойдинлик киритди (видео)

Актёр Йигитали Мамажонов «Дарё» интернет нашри учун эксклюзив интервью берди. Интервьюни «Дарё» мухбири Феруз Муҳаммад ташкиллаштирди.

Суҳбат давомида Йигитали Мамажонов нима сабабдан хонанда Райҳоннинг уйида яшашга рози бўлгани ва «ҳозир ҳам қайнатасининг уйида яшайди», деган гап-сўзларга ойдинлик киритди.

Асло, қайнатамникида яшамайман. Мен бир марта ичкуёвликнинг иссиқ-совуғини татиганман. Биринчи собиқ аёлим Райҳон тўйимиздан олдин ‘меникида яшаймиз’, деб айтганида мен рад қилишга уринганман.

‘Ичкуёвлик бу уят, мен эркак кишиман, сенинг уйингда яшаш менинг ғуруримга тегади, кел, яхшиси, ижарада яшаймиз’, деб айтганимда Райҳон менга ‘менинг онам вафот этган. Онамдан ёлғиз ёдгорим — синглимни бу катта уйга қандай қилиб ташлаб кетаман? Ким қарайди унга? Яхшиси, вазиятни мураккаблаштирмайлик, ахир биз бир оила бўламиз, сеники-меники йўқ, ҳаммаси бизники’, деб айтган.

Ваҳоланки, уйланишимдан олдин мен ўзим билмаган ҳолда нотариусда никоҳ шартномасига қўл қўйиб келган эканман. Кейин билсам, у шартномада ‘агар биз ажрашсак, ҳамма ўз мол-мулки билан қолиши’ ҳақида банд бўлган экан.

Мен ўшанда у қандай шартнома эканлигини билиб қолганимдан кейин Райҳонга ‘демак, сиз менга ишонмаётган экансиз-да, менинг туйғуларим сиз учун аҳамиятсиз экан-да’, деганимда у ёши катта қариндошлари шуни хоҳлашаётганини айтган. Ҳозир ўйлаб қарасам, ҳаммасини ўшанда тўхтатишим керак бўлган экан. У вақтда тўйимизга озгина вақт қолган эди. Мен ҳаммасини яхшиликка йўйиб, уйланаман дедимми, тамом, уйланаман, деб қарор қабул қилганман.

Тўғри, менинг ёмон ниятим бўлмаса ҳам, шунақа ниятли ёшлар бор. Мен ҳам унақаларни биламан. Ўйласам, Райҳон ўшанда эҳтиёткорлик жиҳатидан ақлли иш қилган. Лекин мен 100% Райҳондан ундай нарсалар талаб қилмас эдим. Ўзи мен унинг уйида яшашим уятли нарса, мен яна қандай қилиб бошқа нарса талаб қилишим мумкин? Астағфирулло, ундан кўра ўлиб кета қолай, унақа ҳаром луқмани еганимдан кўра ўлиб кетганим яхши.

Аллоҳнинг измисиз ҳаттоки битта барг шохидан узилиб ерга тушмайди, биз киммиз, биз киммиз? У пайтда мен жуда ҳам содда бола бўлганман. Мана ҳозир ўйлаб, режа қилиб, кинолардан кўриб, ўйлаб, кейин шу ишларни қилсам, ҳақиқатга яқин бўлади.

Инсонларнинг қандай эканлигини кўрдим, анча-мунча билиб олдим. Ора-орада мана шунақа уйланиб фойдаланиш, бойлигига эга бўлиш, тортиб олиш керак экан, деган шайтоний фикрлар ҳам ўтиб туради.

Лекин биз ундай ҳаром луқма еб ўрганмаганмиз. Масалан, ҳозирги ақлим шундай қилишга етади, лекин шундай эркакларни мен ўзим ёмон кўраман. Қандай қилиб ҳазм қиласизлар, дейман.

Бу шаклда тирикчилик қилгандан, шармандаларча ўлганимиз яхши.

Йигитали Мамажонов, актёр, каскадёр