Ўзбекистон ва Покистон ҳамкорлигида Заҳириддин Муҳаммад Бобур ҳақида бадиий фильм суратга олинади

Ўзбекистон ва Покистон етакчиларининг музокаралари якунлари бўйича 15 июль, пайшанба куни Кўксарой қароргоҳида ОАВ вакиллари учун ўтказилган брифингда икки мамлакат ҳамкорлигида Заҳириддин Муҳаммад Бобур ҳаёти ва ижоди акс этувчи фильм яратилиши маълум қилинди. Бу ҳақда «Дарё» мухбири хабар бермоқда.

«Биз Покистон билан маданий-гуманитар соҳада, жумладан, муштарак маънавий меросимизни биргаликда ўрганиш, таълим, соғлиқни сақлаш йўналишларида ҳамкорликни чуқурлаштиришга жиддий эътибор қаратмоқдамиз. Бугунги учрашувда кўплаб масалалар қатори Заҳириддин Муҳаммад Бобур ва Бобурийлар, Муҳаммад Иқбол, Мирзо Ғолиб сингари улуғ мутафаккир ҳамда шоирларнинг ўлмас мероси, маърифий қарашлари халқларимизни боғлаб турадиган мустаҳкам маънавий кўприклиги тўғрисида ҳам суҳбатлашдик.

Шу ўринда бир нарсани мамнуният билан таъкидламоқчиманки, биз халқларимизни боғлаб турувчи бу тарихий ҳақиқатни ҳисобга олиб, аждодимиз, машҳур давлат арбоби ва буюк шоир Заҳириддин Муҳаммад Бобур ҳаёти ва ижоди тўғрисида биргаликда бадиий фильмни яратиш ҳақида ҳам келишиб олдик», — деди Шавкат Мирзиёев.

Покистон бош вазири Имрон Хон келгусида яна бошқа буюк ижодкорлар ҳақида ҳам биргаликда фильм суратга олинишини айтди.

«Маданий алоқаларни ривожлантириш ҳақида мулоқот қилар эканмиз, Заҳириддин Муҳаммад Бобур тўғрисида биргаликда фильм яратиш ғоясининг муҳокамаси қизиқарли ва ҳаяжонли кечди. Бобур империяси Ҳиндистонда 300 йил давомида ҳукм сурган ва бу даврда Ҳиндистон иқтисодиётини шу даражада кўтарганки, жаҳон ялпи ички маҳсулотининг 25 фоизи ўша пайтда шу давлат улушига тўғри келган. У жуда ҳам йирик ва қудратли давлатни яратган.

Бу тарих тўғрисида ҳамда ўртамиздаги бу ришталардан покистонлик ва ўзбекистонлик ёшлар хабардор бўлишлари керак. Келажакда ҳамкорликда шунга ўхшаган бошқа лойиҳаларни амалга ошириш, яъни Муҳаммад Иқбол, Имом Бухорий каби буюк аждодлар тўғрисида ҳам фильмлар суратга олиш ғояси жуда маъқул келди. Бундай лойиҳалар, албатта, икки мамлакатга ҳам манфаат келтиради», — деди Имрон Хон.