iPhone 13 смартфонлари Apple мухлислари узоқ йиллардан буён кутаётган янгиланишга — кенг сиғимли аккумуляторларга эга бўлади, деб ёзади IXBT.
Фото: IXBT
Процессор қанчалик тез ёки суратларни қандай тезликда қайта ишлаши смартфон батареяси тушликка бориб «ўтириб» қолса, аҳамиятсиз. iPhone’нинг мунтазам фойдаланувчиларига эса ушбу ҳиссиёт бегона эмас. Ҳар сафар янги авлод тақдим этилганида тестлар iPhone автономлиги яхшиланаётганини кўрсатмоқда, бироқ ўзгариш кутилганидек бўлмаяпти.
Нашр манбаси янги авлод қурилмалари эга бўладиган аккумуляторларнинг аниқ сиғимини эълон қилган: iPhone 13 Pro Max — 4352 мА/соат (iPhone 12 Pro Max’да 3687 мА/соат), бир хил экранга эга iPhone 13 ва iPhone 13 Pro моделларига — 3095 мА/соат (2816 мА/соат ўрнига). iPhone 13 mini’нинг аккумулятор сиғими 2227 дан 2406 мА/соатга қадар ошади.
Шунингдек, маълумотларга кўра, бир кристалли Apple А15 тизими смартфонларнинг энергия сарфини 15-20 фоизга тежаш имконини беради. Бундан ташқари, қурилмалар адаптив тасвир янгиланиш частотасига эга янги экранларга эга бўлади.
Аввалроқ интернетда iPhone 13 Pro’нинг қувватлантириш «разём»исиз тасвирланган суратлари тарқалган, Apple компанияси iPhone 13 моделлари тақчил бўлишидан огоҳлантирган эди.
