Dunyo miqyosida mikrosxemalarning taqchilligi barcha sohalar uchun jiddiy muammo tug‘dirmoqda: hatto Apple kompaniyasi bu iPhone ishlab chiqarishga ta’sir ko‘rsatishini ma’lum qilgan, deb yozadi IXBT.

Foto: IXBT

Apple rahbariyatining ma’lum qilishicha, moliyaviy yilning to‘rtinchi choragida daromad ortadi, biroq uchinchi chorakdagi 36,4 foizli o‘sish sur’atlaridan oshmaydi. Kompaniya vakillarining qo‘shimcha qilishicha, uchinchi chorakda mikrosxemalar yetishmovchiligi u qadar jiddiy bo‘lmagan bo‘lsa-da, to‘rtinchi chorakda vaziyat og‘irlashishi va bu iPhone ishlab chiqarish ta’sir ko‘rsatishi taxmin qilingan.

Apple bosh direktori Tim Kukning so‘zlariga ko‘ra, taqchiligi kuzatilyotgan mikrosxemalar eski texnologiya yordamida ishlab chiqarilsada, iPhone yaratishdagi qo‘shimcha komponent sifatida juda muhim ahamiyatga ega. Tahlilchilarning hisoblashicha, Apple keyingi avlod iPhone modellari uchun chiplarni to‘plashni boshlashi mumkin.

Mikrosxemalarning dunyo bo‘ylab kuzatilayotgan taqchilligiga bir necha sabablar mavjud, xususan, koronavirus pandemiyasi sabab zavodlarning yopilishi va lokdaun hamda masofadan turib o‘qish/ishga o‘tilgani sabab maishiy elektronikaga bo‘lgan talabning ortib ketishi.

Samsung va Apple’ning vaziyati boshqa smartfon ishlab chiqaruvchi kichik kompaniyalarnikidan yaxshiroq. HMD Global kompaniyasi yarim o‘tkazgichlar yetishmovchiligi u qadar katta bo‘lmagan ishlab chiqaruvchilarga muammo tug‘dirishi mumkinligidan ogohlantirgan.