OnePlus’нинг собиқ директори Карл Пейга тегиш бренд ўзининг биринчи маҳсулоти — шаффоф элементларга эга Nothing Ear (1) TWS-наушникларини тақдим этди, деб хабар беради «Afisha.uz».
«Оёқчаси»да шаффоф элементларга эга наушникларнинг ҳар бири оқ ва қора рангларга бўялган. Улар ичида 11,6 миллиметрли драйвер ва учтадан микрофон жойлашган бўлиб, бу фаол шовқин сўндириш тизимининг ишлашини таъминлайди. Шунингдек, «шаффоф» режим ҳам мавжуд ва гаджет IPX4 стандарти бўйича ҳимояланган.
Наушникнинг квадрат шаклидаги қувватлантириш кейси шаффоф қопқоққа эга ва у симсиз ёки USB Type-C орқали қувватлана олади. Унинг ичида сиғими 570 мА/соатга тенг аккумулятор жойлашган бўлиб, 10 дақиқали қувватланиш наушникларнинг 80 дақиқа ишлашини таъминлашга қодир. Ишлаб чиқарувчининг маълум қилишича, наушниклар бир марта қувватланиш орқали шовқин сўндириш функцияси ёқилган ҳолда 4 соат, ўчирилган ҳолда эса 5,7 соат ишлай олади.
Гаджетнинг ўзининг махсус мобил иловаси орқали созлаш мумкин. У ерда наушник ва унинг кейсини қуввати ҳам кўрсатилади. Шунингдек, қўл хатти-ҳаракатлари ёрдамида бошқарув, интенсив шовқин сўндириш ва эквалайзерни бошқариш имконияти бор. SBC ва ААC кодекларини қўллаб-қувватлайди.
Мазкур наушникларни Буюк Британия, Ҳиндистон, Европа давлатлари ва Шимолий Америкада 31 июлдан бошлаб 117 долларга харид қилиш мумкин.
Аввалроқ янги LG наушникларида шивирлаб гапириш имконини берадиган режим пайдо бўлгани, McLaren компанияси карбон корпусли симсиз наушникларини тақдим этгани тўғрисида хабар берилганди.
Изоҳ (0)