«Спутник V» вакцинасининг иккинчи дозаси Ўзбекистонда қолмагани ҳақида хабар берилганди. Ушбу хабар юзасидан Соғлиқни сақлаш вазирлиги муносабат билдирди.
Қайд этилишича, шу кунга қадар Ўзбекистонга 370 минг доза «Спутник V» вакцинаси олиб келинган. Уларнинг 230 000 дозаси 1-компонент, 140 000 дозаси 2-компонент ҳисобланади.
2021 йил 4 август ҳолатига кўра, 341 260 доза «Спутник V» эмлаш жараёнларида қўлланилган бўлиб, 212 818 нафар шахс вакцинанинг фақат биринчи дозасини олган. 128 442 нафар фуқаро 2-дозани ҳам қабул қилиб, тўлиқ эмланган.
Маълум қилинишича, вакцинанинг ҳар иккала компонентлари миқдори тенглашиши учун Ўзбекистонга яна 90 минг доза вакцина келтирилиши керак. «Спутник V»нинг 90 минг дозалик 2-компоненти яқин кунларда мамлакатга келтирилиши кутилмоқда.
«Гамалея номли илмий тадқиқот институти директори Александр Гинсбург ва соҳанинг қатор нуфузли олимлари ‘Спутник V’ вакцинасининг биринчи ва иккинчи компонентлари билан эмланиш оралиғини 21 кундан 90 кунгача узайтириш мумкинлигини маълум қилган.
Хулоса қилиш мумкинки, вакцинанинг компонентларини қабул қилиш оралиқ муддати узайиши ҳам унинг таъсир кучига монелик қила олмайди», – дейилади вазирлик хабарида.
Эслатиб ўтамиз, Олмалиқ шаҳридаги Журабек лабораториэс қўшма корхонасида ҳам коронавирусга қарши вакцина ишлаб чиқарилиши режалаштирилмоқда. Шу йилнинг 29 июль куни Президент Шавкат Мирзиёев ушбу корхона фаолияти билан танишган эди.
Бундан аввал Ўзбекистонда «Спутник V» вакцинасининг биринчи партияси ишлаб чиқарилгани ҳақида хабар берилганди.
Изоҳ (0)