Ижтимоий тармоқларда 5 август куни имтиҳонлардаги тест саволлари тарқалиб кетгани бўйича хабарлар пайдо бўлди. Ҳолат юзасидан Давлат тест маркази изоҳ берди.
Қайд этилишича, математика фанидан тест топшириқлари акс этган 1173366 рақамли тест топшириқлари китоби диагностик тест синовларига тааллуқли бўлиб, Бухоро вилоятидаги «GMК» ўқув маркази томонидан 1 май куни 13288 рақам билан буюртма қилинган ва 5 май куни тест материаллари ўқув марказига етказилган. Мазкур тест топшириқлари китоби 5 август санасидан бошланган олий таълим муассасаларининг бакалавриат таълим йўналишларига кириш тест синовларига тааллуқли эмас.
Математика ва биология фанларидан тест топшириқлари акс этган, лекин тест топшириқлари рақами кўринмаган тест топшириқлари китоблари диагностик тест синовларига тааллуқли бўлиб, мазкур тест топшириқлари китоблари 5 август санасидан бошланган олий таълим муассасаларининг бакалавриат таълим йўналишларига кириш тест синовларида ишлатилмаган.
Кимё фанидан тест топшириқлари акс этган 7016128 рақамли тест топшириқлари китоби 2020 йилда ўтказилган тест синовларига тааллуқли бўлиб, мазкур абитуриент тест синови вақтида телефондан фойдаланаётгани аниқланиб, далолатнома асосида тест синовларидан четлаштирилган.
Биология фанидан тест топшириқлари акс этган 1122414 рақамли тест топшириқлари китоби 5 август куни Наманган вилоятида ўтказилган тест синовларига тааллуқли бўлиб, мазкур абитуриент тест синови вақтида телефондан фойдаланаётгани аниқланиб, далолатнома асосида тест синовларидан четлаштирилган.
Бундан аввал Ўзбекистонда ОТМларга кириш имтиҳонлари ўтказиладиган стадион ва хиёбонлар рўйхати эълон қилингани ҳамда Ўзбекистонда қанча абитуриент ОТМларга ҳужжат топширгани маълум қилингани ҳақида хабар берилганди.
Изоҳ (0)