Қашқадарё вилоят судида фаолият юритувчи 73 нафар судья 2021 йилнинг ўтган даври мобайнида 27 нафар шахсга нисбатан оқлов ҳукмини чиқарган. Бу ҳақда Қарши шаҳридаги Журналистлар уйида вилоят суди масъуллари билан бўлиб ўтган матбуот анжуманида маълум қилинди, дея хабар берди «Дарё» мухбири.
Матбуот анжуманида сўз олган вилоят суди раиси Абдуқаюм Маҳкамовнинг маълумот беришича, 2014 йил вилоятда 2 нафар судланувчи оқланган бўлса, 2015 йилда бу кўрсаткич 4 нафарни, 2017 йилда 17 нафарни, 2018 йилда 93 нафарни, 2019 йилда 146 нафарни ва 2020 йилда 47 нафарни ташкил қилган. 2021 йилнинг ўтган даврида эса 27 нафар шахс айбсиз деб топилиб, оқланган.
«Жорий йилнинг ўтган даври мобайнида 96 та иш бўйича 110 та асоссиз айблов рад этилган. 13 нафар реабилитацияга келган фуқароларга 501 миллион 339 минг сўмлик моддий зарар ундириб берилган. Тайинланган жазо чоралари ҳақида гапирадиган бўлсак, йилнинг ўтган давр мобайнида 150 нафар шахсга жарима, 14 нафар шахсга мажбурий жамоат ишлари, 445 нафар судланувчига эса ахлоқ тузатиш ишлари, 367 шахсга озодликни чеклаш, 299 нафар кишига озодликдан маҳрум қилиш, 1 нафар шахсга умрбод озодликдан маҳрум қилиш жазоси тайинланган», — дейди вилоят суди раиси.
Қайд этилишича, вилоятда шу давр мобайнида 162 нафар аёлга нисбатан иш очилган бўлиб, 132 нафарига ҳукм чиқарилган. 30 нафарига қўзғатилган иш тугатилган. 14 нафар аёл озодликдан маҳрум қилиш билан жазоланган бўлса, 65 нафар 60 ёшдан ошганларнинг 6 нафарига озодликдан маҳрум қилиш жазоси тайинланган.
«Шу даврда Ёшлар ишлари агентлигининг кафиллиги асосида 4 нафар шахсга нисбатан 2 та иш, маҳалла фуқаролар йиғини кафиллиги асосида 16 шахсга нисбатан 10 та иш кўрилиб, уларнинг барчасига озодликдан маҳрум қилиш билан боғлиқ бўлмаган жазо чоралари қўлланилган», — дейди Абдуқаюм Маҳкамов.
Изоҳ (0)