Туркиядаги ўрмон ёнғинларининг коинотдан олинган суратлари

Туркия Мудофаа вазирлиги мамлакат жануби ва жануби-ғарбидаги ўрмон ёнғинларининг коинотдан олинган суратларини эълон қилди. Суратлар разведка-сунъий йўлдошларида олинган.

«Юқори сифатли суратга олиш хусусиятига эга Göktürk-1 ҳамда Göktürk-2 разведка-сунъий йўлдошлари Манагват ва Мармарисдаги ўрмон ёнғинлари, оловга қарши курашнинг коинотдан олинган тасвирларини тақдим этди», – дейилади вазирлик хабарида.

Суратларда ёнғин сабаб зарар етган ҳудудлар, кул билан қопланган ўрмонларнинг тасвири акс этган.

Аввал Туркия президенти Ражаб Тоййиб Эрдўғон Анталияни фалокат ҳудуди деб эълон қилгани, унинг матбуот котиби Иброҳим Калиннинг эса ўрмон ёнғинларини мамлакат учун миллий фалокат эканлигини таъкидлагани ҳақида хабарлар берилган. Туркияда ўрмон ёнғинлари оқибатида саккиз нафар одам ҳалок бўлган.

Шунингдек, Эрдўғон ёнғинларнинг уюштирилганини қайд этган ва олов ёққанлиги гумон қилинаётганлардан бирининг ҳибсга олинганини маълум қилган. Туркияда террорчилик ташкилоти деб топилган «Курдистон ишчи партияси»нинг «Олов болалари» шўъба гуруҳи ўрмон ёнғинларининг уюштирилганлиги юзасидан масъулиятни ўз зиммасига олган.