Фарғона вилояти Тошлоқ туманида Matiz 13 ёшли қизни уриб кетди. Бу ҳақда «Янги давр» информацион дастурида хабар қилинди.
Фарғона вилояти ИИБ ЙҲХБ келиб тушган хабарга кўра, Тошлоқ тумани Қашқар қишлоғи ҳудудидан ўтган 4К-842 Заркент–Қалъача автомобиль йўлининг 1-километрида Matiz ҳамда Nexia ўртасида тўқнашув содир бўлган.
Дастлабки маълумотларга кўра, Matiz автомобили ҳайдовчиси ўзига нисбатан битта йўналишда ҳаракат қилиб келаётган Nexia автомобилини қувиб ўтиш қоидасини бузиб, йўл четидаги пиёда – 13 ёшли қизни уриб кетган ва Nexia билан тўқнашган.
Пиёда тан жароҳати олиб, шифохонага олиб борилган. Кўрсатилган тиббий муолажаларга қарамасдан қиз шифохонада вафот этган.
Ҳозирда тезкор тергов гуруҳи ҳамда мутасадди ходимлари билан биргаликда воқеа тафсилотлари ўрганилмоқда.
Бундан аввал Наманганда Nexia йўл четидаги пастликка қулаши оқибатида йўловчи аёл вафот этгани, Сурхондарёда йўлнинг қарама-қарши тарафига чиқиб кетган «Жигули» уч автомобиль билан тўқнашиши оқибатида бир киши ҳалок бўлгани ҳамда Қашқадарёда катта тезликда йўл ёқасидаги дўконга бориб урилган Nexia ҳайдовчиси ҳалок бўлгани ҳақида хабар берилганди.
Изоҳ (0)