Germaniyada natsistlar konslagerida qorovul bo‘lib ishlagan 100 yoshli erkak sud qilinadi

Germaniyada 20 ming odam o‘ldirilgan Zaksenxauzen natsistlar konslagerining sobiq qo‘riqchisi sudga chaqirildi. Sud jarayoni oktabr oyida Noyruppin tuman sudida boshlanadi.

Tergov ma’lumotlariga ko‘ra, erkak 1942-yilning yanvaridan 1945-yilning fevraligacha Zaksenxauzenda xizmat qilgan. Hozirda gumonlanuvchi 100 yoshda.

“Qotillik bo‘yicha da’vo muddati cheklanmagan, shuning uchun keksalar ham sudda javob berishi kerak”, — deydi Berlindagi “Terrorizm topografiyasi” hujjatlari markazining tadqiqotchisi Stefani Bor.

Yoshini hisobga olgan holda, sudlanuvchi sud majlisida ikki yarim soatdan ko‘p bo‘lmagan vaqt davomida ishtirok etadi, dedi sud raisi Frank Shtark.

Sud majlisida da’vogarlar ham qatnashadi.

“Zaksenxauzen natsistlar rahbariyati uchun Berlin darvozalaridagi joy edi, ular hayot va o‘lim ustidan hukmronlik qilyapmiz, degan xayolda bo‘lgan. Da’vogarlarning aksariyati ayblanuvchi bilan tengdosh va adolatdan umidvor”,— deydi da’vogarlarning advokati Tomas Valter.

Zaksenxauzen Berlin shimolida, Oraniyenburg shahri yaqinida joylashgan. 1936-yildan 1945- yilgacha 200 mingdan ortiq odam bu konslagerdan o‘tgan. Zaksenxauzendagilar 1945-yilning 22—23-aprelida Qizil armiya tomonidan ozod qilingan.

Avvalroq 96 yoshli ayol Ikkinchi jahon urushi yillarida Polsha konslagerida saqlangan 11 300 mahbusning o‘ldirilishiga aloqadorlikda ayblanib, sud qilinishi haqida xabar berilgandi. Ayol 18 yoshidan boshlab 1943-yil iyundan 1945-yil aprelgacha Polshadagi Shtuttgof konslageri komandirining kotibasi bo‘lib ishlagan.

Ayolga qarshi ochilgan jinoiy ishda 11 387 ta qotillik qayd etilgan bo‘lib, jabrlanganlarning yettitasi tirik qolgan. Sud jarayoni 30-sentabrda boshlanadi.