Енгил атлетика бўйича Токио—2020 Олимпиадасида Беларусь шарафини ҳимоя қилиши кўзда тутилган Кристина Тимановская тазйиққа учради.
Тимановская 2 август куни 200 метрга югуриш бўйича мусобақаларда иштирок этиши керак эди. Бироқ спортчи ҳали ўз иштирокини ўтказишга улгурмасидан Токиони тарк этиши белгиланган. Тимановскаянинг қайд этишича, Беларусь ҳукумати уни Токиодан депортация қилишга уринган. Ўзини руҳшунос сифатида таништирган киши Тимановскаяга Токиони тарк этиши кераклиги ҳақида маълум қилган. «Терма жамоа бош мураббийи бу қарор енгил атлетика федерацияси ёки спорт вазирлиги томонидан эмас, унданда юқори ташкилот томонидан чиқарилганини айтди», — дейди спортчи.
Ўз навбатида спортчи ушбу босимларга реакция билдирган ва Халқаро Олимпия қўмитасидан (ХОҚ) ёрдам сўраган. Айни вақтда ХОҚ вазиятни ўз назорати остига олган.
Беларусь олимпия қўмитаси бу ҳолатга изоҳ берди.
«Шифокорлар хулосасига кўра Кристина Тимановскаянинг руҳий-психологик ҳолатидан келиб чиқиб, жамоа мураббийлар штаби томонидан спортчининг Олимпия ўйинларидаги иштирокини якунлаш ҳақида қарор қабул қилинди. Ўз навбатида унинг 200 метрга югуриш ва 4х400 метр эстафетадаги иштироки бекор қилинди», — дейилади Беларусь МОҚ баёнотида.
Маълумот учун, Тимановская Олимпия ўйинларида 200 метрга югуриш баҳсларида иштирок этиши кўзда тутилганди. Японияда спортчи кутилмаганда 4х400 метр эстафета баҳсларида иштирок этувчилар рўйхатига киритиб қўйилади. Натижада Кристина мураббийларнинг бу қароридан ғазабга келганини таъкидлаб, ижтимоий тармоқларда пост қолдиради. Шундан кейин уни мамлакатга қайтариш ҳаракати бошланади. Бироқ вазиятга ХОҚ аралашди ва айни вақтда якуний қарор чиқарилиши кутилмоқда.
Изоҳ (0)