Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 1 август кунги чиқишларини якунлади.
Юнон-рум кураши
Рио—2016 Олимпиадаси совриндори Элмурат Тасмурадов (-60 кг) дастлабки босқичда Ўзбекистонда туғилган, ҳозирда Украина байроғи остида қатнашаётган Ленур Темировга тўқнаш келди. Унда Темиров 5:0 ҳисобида ғалаба қозониб, Элмуратни мусобақадан чиқариб юборди.
Мўминжон Абдуллаев (-130 кг) биринчи даврада эстониялик Артур Витининни таслим этди. Абдуллаев чорак финалда чилилик Ясмани Фернандесга қарши кураш олиб борди ва 0:2 ҳисобида ютқазиб қўйди.
Темиров ва Фернандес финалга қадар етиб бора олмади. Шу тариқа ўзбекистонлик курашчилар бронза учун кураш олиб бориш имкониятидан маҳрум бўлди ва Олимпиада билан хайрлашди. Қайд этиш керак, Тасмурадов 2016 йилги Рио Олимпия ўйинларида бронза медалига эга чиққанди.
Енгил атлетика
Даря Резниченко узунликка сакраш бўйича саралаш баҳсларида иштирок этди. B гуруҳида иштирок этган Ўзбекистон вакили 6.19 метр натижа қайд этди. Табиийки, бу саралашдан ўтиш учун камлик қилди ва Резниченко шу нуқтада Олимпиададаги иштирокини якунлади.
Бокс
+91 кг вазн тоифасида иштирок этаётган Баҳодир Жалолов чорак финалда ҳиндистонлик Сатиш Кумарга қарши баҳс юритди ва кутилганидек ишончли ғалабани қўлга киритди. Шу тариқа Баҳодир ярим финалга йўл олиш қаторида ўзи учун камида бронза медалини нақд қилиб қўйди. Ярим финалда ўзбекистонлик боксчи Буюк Британия вакили Фрэйзер Кларкка қарши рингга кўтарилади.
Оғир атлетика
-76 кг вазн тоифасида Ўзбекистон шарафини ҳимоя қилган Кумушхон Файзуллаева даст кўтаришда 101 кг, силтаб кўтаришда 126 кг, умумий ҳисобда эса 227 кг натижа қайд этди. Бу орқали Кумушхон олтинчи поғонани банд этди ва Олимпия ўйинлари совринига эга чиқолмади.
Шу тариқа Токио—2020 Олимпиадасида иштирок этмаган оғир атлетикачилардан фақат Акбар Жўраев қолди. -109 кг вазн тоифаси вакили 3 август куни ўз иштирокини ўтказади.
Изоҳ (0)