Тожикистонда АҚШ ёрдамида қайта таъмирланган Афғонистон билан чегара пости фаолиятини бошлади

Тожикистоннинг Афғонистон билан чегарасида АҚШнинг молиявий кўмаги ёрдамида қайта таъмирланган пост очилди. Бу ҳақда Тожикистоннинг «Ховар» ахборот агентлиги хабар қилган.

Тожикистон ва АҚШ ҳукуматлари ҳамкорлигида 30 июль куни Хатлон вилоятида Тожикистон республикаси давлат хавфсизлик қўмитаси чегара қўшинларининг пости фойдаланишга топширилган. Очилиш маросимида Тожикистон чегара қўшинлари қўмондони ўринбосари Ражаб Саодатзода ҳамда АҚШнинг Душанбедаги ишончли вакили вазифасини вақтинча бажараётган Жон Гинкел иштирок этган.

Чегара ўтказиш пунктини қайта таъмирлашнинг қиймати 570 минг АҚШ долларига баҳоланмоқда. Мазкур постда қўшимча кузатув имкониятлари, Хатлон вилоятининг Шаҳритус туманидаги чегарада патруль тадбирларини ўтказиш учун зарур шароитлар яратилган. Қайта таъмирланган пост чегара қўшинларининг чегарани бузиб ўтиш ҳолатларини аниқлаш, шубҳали ҳаракатларни кузатиш имкониятларини кўпайтириши ва трансмиллий хавф-хатарларни олдини олиш, хусусан, ноқонуний йўллар билан гиёҳванд моддаларни олиб кириш, контрабанда ва қуролли экстремизмни баратаф этишдаги имкониятларини оширади.

Ўз навбатида АҚШнинг Тожикистондаги элчихонаси ўз расмий сайтида Хатлон вилояти Шаҳритус туманидаги чегара ўтказиш пунктини таъмирлашга 570 минг доллар ажратилганини маълум қилган.

«АҚШ Тожикистон хавфсизлиги ва суверенитетини қўллаб-қувватлаш, Афғонистонда тинчлик ҳамда барқарорликни таъминлаш учун ҳамиша ҳамкорликка тайёрлигини билдиради», – дейилади элчихона хабарида.

2007 йилда АҚШ гиёҳвандликка қарши кураш ва ҳарбий ҳамкорлик бошқармаси Тожикистонга чегара заставаларини таъмирлаш учун 155 миллион доллардан кўпроқ маблағ ажратган.

«Қўшма Штатлар Тожикистон билан 30 йилдан буён ҳамкорлик қилади ва ушбу давр мобайнида мамлакат тараққиёти учун, хусусий сектор, қишлоқ хўжалиги, соғлиқни сақлаш, демократик институтлар ва Тожикистон хавфсизлиги учун 1,8 миллиарддан кўпроқ маблағ ажратган», – дейилган хабарда.

Эслатиб ўтамиз, 14 апрелда АҚШ президенти Жо Байден Афғонистон ҳудудидан мамлакат қўшинининг олиб чиқилишини эълон қилди. Қўшинни олиб чиқиш, август охири сентябрь бошларида якунига етади. АҚШ қўшини Афғонистон ҳудудидан олиб чиқиб кетиш бошланганидан бери «Толибон» ҳаракати бир нечта йўналишдаги ҳужум ҳаракатларини жадаллаштирган. «Толибон» вакиллари берган баёнотга кўра ҳаракат мамлакатнинг тахминан 85 фоиз қисмида бошқарувни ўз назоратига олган. Хусусан, Афғонистоннинг бешта давлат: Эрон, Хитой, Покистон, Тожикистон ва Туркманистон билан чегара қисми «Толибон» вакиллари томонидан эгалланган.