Туркиянинг бир нечта вилояти ўрмон ёнғинлари туфайли фалокат ҳудудлари деб эълон қилинди. Бу ҳақда мамлакат президенти Ражаб Тоййиб Эрдўғон Twitter’даги саҳифасида маълум қилган. Гап Анталия, Адана, Мерсин, Мугла ва Усмония ҳақида бормоқда.
«Мамлакатимиз жароҳатларини даволаш ва зарар ўрнини қоплаш учун барча зарур чора-тадбирларни амалга оширишда давом этамиз», — дея ёзган Эрдўғон.
Анталиядаги ўрмон ёнғинлари саратон ва қуруқ иқлим туфайли 28 июлда бошланган. Олов вилоятдаги қишлоқ хўжалиги майдонлари ва аҳоли турар жойларига ҳам етиб келган. Туристларнинг экскурсиялари вақтинча тўхтатилган, айрим ҳудудларда аҳоли хавфсиз жойга эвакуация қилинган.
Маълум вақт ўтгач ўрмон ёнғинлари мамлакатнинг бошқа курорт шаҳарларига ҳам етиб борди, жумладан Мармарис ва Бодрум оловдан зарар кўрди. Мармарис маъмурияти маҳаллий аҳоли ҳамда меҳмонхоналарда ҳордиқ чиқараётган туристларни эвакуация қилишга қарор қилди. Бодрумда эса ўрмон хўжалигининг Муглин ҳудудий бошқармаси ёнғин ўчириш гуруҳлари фавқулодда ҳолат содир бўлаётган жойларга юборилган.
Ўрмон ва қишлоқ хўжалиги вазири Бекир Пакдемирлигининг айтишича, 28 июлдан 31 июлгача бўлган оралиқда мамлакат ҳудудида жами 98 та ўрмон ёнғини кузатилган, уларнинг аксар қисми Адана ва Анталияда содир бўлган. Ёнғинларнинг 88 таси бартараф этилган.
Эрдўғон администрацияси вакили Иброҳим Калин ўрмон ёнғинларини Туркия учун миллий фалокат деб атаган. Шунингдек, у ўрмон ёнғинларининг келиб чиқиш сабаблари прокуратура томонидан тафтиш қилинаётганини билдирган.
Изоҳ (0)