Ҳокимият тепасига келган ҳарбийлар томонидан тузилган Мьянма Давлат маъмурий кенгаши мамлакатда вақтинчалик ҳукумат шакллантирилганини эълон қилди. Бу ҳақда Sinhua агентлиги фармонга таяниб хабар берди, деб ёзади «РБК».

Мин Аун Хлайн

Фото: AP Photo

Ҳужжатда айтилишича, Мьянма Қуролли кучлари олий бош қўмондони, Давлат маъмурий кенгаши раиси Мин Аун Хлайн бош вазир лавозимини эгаллайди.

Мьянмада ҳарбийлар 1 февраль куни юз берган давлат тўнтаришидан кейин ҳокимият тепасига келди. Армия вакиллари мамлакат президенти Вин Мйинни ва «Демократия учун миллий лига» ҳукмрон партияси раҳбарларини ҳокимиятдан четлатди. Ўз хатти-ҳаракатларини улар, гўёки 2020 йил ноябрдаги сайлов кампанияси чоғида йўл қўйилган сохталаштиришлар билан асослади.

Давлат тўнтаришига жавобан катта кўламда норозилик акциялари бошланди. Шу сабабли февраль ўрталарида мамлакатнинг янги раҳбарияти интернетни узиб қўйишига тўғри келди. Ўшанда Reuters куч вакиллари намойишчиларга қарши ўт очгани, бир қатор шаҳарларга эса ҳарбий техника киритилганини маълум қилганди. Сиёсий маҳбусларга ёрдам бериш ассоциацияси маълумотларига кўра, 27 март ҳолатига мамлакатда митинглар тарқатилиши чоғида ҳалок бўлганлар сони 423 кишини, ҳибсга олинганлар — 2,4 мингдан зиёдни ташкил қилган.