АҚШ Россиядаги Америка дипломатик миссиясининг 182 нафар ходимини ишдан бўшатади. Бунга Москванинг АҚШга чет элликларни ва учинчи давлат фуқароларини ишга ёллашни тақиқлагани сабаб бўлмоқда.
«Август ойидан бошлаб Россия ҳукумати АҚШга қўриқчилардан ташқари, Россия ёки учинчи давлатлар фуқароси бўлган ходимларни ишда қолдириш ёки ёллашни тақиқлади. Шу сабабли Москва, Владивосток ва Екатеринбургдаги дипломатик ваколатхоналаримиздан 182 нафар маҳаллий ходимни ишдан бўшатишга мажбур эканимиздан хафамиз. АҚШ Россия билан олдиндан айтиб бўладиган ва барқарор муносабатларни сақлаб қолишда ўз мажбуриятларини бажаради», — деди АҚШ давлат котиби Энтони Блинкен.
Блинкен ходимларга хизматлари учун миннатдорчилик билдирди ҳамда бундай ишдан бўшатиш Россия ҳукумати қарорларининг бевосита натижаси эканини таъкидлади.
Москва ва Вашингтон ўртасидаги муносабатларнинг кескинлашуви сўнгги марта 15 апрель куни, Америка президенти Жо Байден Россияга нисбатан янги санкциялар киритганидан кейин юз берди. Янги санкциялар Россиянинг АҚШдаги 2020 йилги президентлик сайловларига аралашиши, АҚШ ҳукумат идораларига қилинган киберҳужум ва Россиянинг Афғонистондаги америкаликларга қарши «Толибон» жангарилари билан тил бириктиргани билан боғлиқ.
Шунингдек, АҚШ мамлакатдан 10 нафар россиялик дипломат чиқариб юборилиши ҳақида эълон қилди. Бунга жавобан Москва ҳам 10 нафар америкалик дипломатни мамлакатдан чиқариб юбориш тўғрисида ўзаро қарор қабул қилганини эълон қилди.
Дипломатларни чиқариб юбориш билан бир қаторда, Россия АҚШ дипломатик ваколатхоналарига Россия ва учинчи мамлакатлар фуқароларини маъмурий ва техник ишчилар сифатида ёллашни тақиқлади.
Россияга қарши янги санкциялар эълон қилинишидан сал аввалроқ Путин ва Байден ўртасида телефон орқали суҳбат бўлиб ўтган эди, унда АҚШ президенти Путин билан шахсан учрашишни ва Москва ва Вашингтон ўртасидаги муносабатларни муҳокама қилишни таклиф қилди.
16 июнь куни Владимир Путин ва Жо Байден Женевада Россия ва Америка президентлари сифатида биринчи марта учрашув ўтказди. 28 июль куни Женевада АҚШ ва Россия вакиллари стратегик барқарорлик бўйича Россия—Америка маслаҳатлашувлари доирасида ўзаро мулоқотларни давом эттирди. Икки давлат урол-яроғ устидан назоратни муҳокама қилди. Таъкидланишича, музокараларда АҚШ Россия билан конструктив мулоқотга тайёрлигини намойиш этган.
Изоҳ (0)