«Толибон» Афғонистонда ҳокимиятни ҳарбий йўл билан эгаллаб оладиган бўлса, уларнинг ҳукумати Евроиттифоқ ва минтақадаги кўпчилик давлатлар томонидан тан олинмайди. Бу ҳақда Евроиттифоқнинг Афғонистондаги махсус элчиси вазифасини бажарувчи Томас Никлассон маълум қилди, деб ёзади «Коммерсантъ» Унинг қайд этишича, воқеалар ривожи шундай тус олса, «Толибон» ва Афғонистон халқаро майдонда яккалаб қўйилади.
«Агар ‘Толибон’ ҳокимиятни ҳарбий йўл билан эгаллаб олса, у на Евроиттифоқ томонидан ва на минтақанинг кўпчилик давлатлари томонидан тан олинади», — деди Никлассон. Унинг фикрича, бу ҳолда «Толибон» ҳукумати «яккаланган режим»га айланади.
Никлассоннинг таъкидлашича, Евроиттифоқ мамлакатда вазиятнинг бундай ривожланишидан хавотир билдирмоқда ва унинг аҳолисига гуманитар ёрдам ажратилишига уринмоқда. «‘Толибон’ ўзлари нима истаётганини ифодалаб берадиган аниқ-равшан таклифларни билдирмади. Бу музокараларнинг бир қисми ва улар зарурий бўлган кейинги қадамга айланади», — деди у.
Аввалроқ Россия Афғонистондаги ҳокимият «Толибон» жангарилари томонидан тўлиқ эгаллаб олиниши сценарийсига тайёрлиги, аммо воқеаларнинг бундай ривожланишини ҳақиқатдан йироқ деб ҳисоблашини маълум қилганди.
Афғонистондан Америка қўшинлари олиб чиқила бошлангандан сўнг, «Толибон» Кобул, Қандаҳор, Мозори-Шариф каби шаҳарларга қатор йирик ҳужумлар уюштирди, аммо уларни қўлга кирита олмади. Ўтган ҳафта ҳаракат вакиллари мамлакат чегараларининг 90 фоизини назорат қилаётганини маълум қилди. БМТнинг таъкидлашича, «Толибон» сўнгги 20 йил ичидаги энг кўп ҳудудларни ўз назоратига олган.
Тўқнашувлар натижасида нафақат қочқинлар, балки чекинаётган ҳукумат қўшинлари ва жангарилар ҳам оммавий равишда қўшни Тожикистон, Ўзбекистон, Покистон ҳудудларига кириб кела бошлади. Ушбу давлатларнинг расмийлари чегараларни мустаҳкамлади. Халқаро ҳамжамият Афғонистондаги зиддиятнинг авж олишини кескин қоралади ва томонларни музокаралар ўтказишга чақирди.
Изоҳ (0)