Мутахассисларнинг фикридан келиб чиққан ҳолда харид қилиш тавсия қилинмайдиган ўйинчоқлар ҳақида маълумот бериб ўтамиз.
Спиннер
Сал аввал ҳар бир боланинг қўлида бўлган ушбу ўйинчоқ билан бир нечта ёқимсиз ҳолатлар юз берган. АҚШда бир болакай элементлари бир-биридан ажраладиган спиннернинг кичик деталини ютиб юборган. Ушбу юз берган ҳодиса ҳақида ижтимоий тармоқ фойдаланувчилари ўз саҳифасида бўлишган. Америкада аллақачон болаларнинг мактабда спиннердан фойдаланиши тақиқланган. Ўйинчоқлар ўсмирларни ўқишдан чалғитиб, диққатни жамлашига халал беради деб ҳисобланади.
Магнитли конструктор (неокуб)
Майда магнитли шарчалардан иборат ўйинчоқ ўрамида 3 ёшдан катта болаларга мўлжалланган деб ёзилганига қарамай, аслида 12-14 ёшгача бўлган болаларга мумкинлиги ҳам шубҳали. Конструкторни тишлари билан қисмларга ажратишга ҳаракат қилган пайти кичкинтойлар шарчаларни ютиб юбориши мумкин. Организмга кирганида магнитлар бирлашиб ичакларни шикастлайди. Шу сабабдан ҳам мутахассислар кичик ёшли болалар учун бу каби конструкторларни харид қилмасликни тавсия қилади.
Шарлар
Беозор кўринган шарлар ҳам болага зарар етказиши мумкин. Айтишларича, ёрилган шар шовқини милтиқдан отилган ўқ шовқини билан баробар. Шунинг ҳисобига бола қаттиқ қўрқиб кетиши мумкин. Қолаверса, баъзида пуфлаганда ҳам ёрилиб кетиб, маълум қисми оғизга кириб кетади. Мутахассисларнинг фикрича, шарларни болаларга бермаслик керак.
Поп-ит
Охирги вақтда, айниқса, машҳурликка эришган мазкур ўйинчоқ моторикани яхшилаб, тинчлантиришга ёрдам беришига ишонилади. Аммо мутахассислар унинг фойдасидан кўра, зарари кўпроқ деб билади. Психологлар поп-итни тобеликни келтириб чиқариши мумкин бўлган ҳақиқий «эмоционал фастфуд» деб ҳисоблайди.
«Бола ушбу ўйинчоқни мустақил равишда ҳеч қандай қоидаларсиз ўйнаши бу болаларда шундоқ ҳам кўп бўладиган неврологик ўзгариш — мияга ўрнашиб қоладиган ҳаракатларни ривожлантиради. Улар кўзларини тез-тез пирпиратади, сочларини бармоқларига ўраб, оғзига солиши, тирноқларини тишлаши, оғзига нарса солиши мумкин», — дейди психолог Елена Игина.
Отадиган ўйинчоқлар
Бугунги кунда мутахассислар сотувдаги ўйинчоқларнинг зарарини таҳлил қилиш учун аввалгидан фарқли равишда кўпроқ вақт сарфлайди. Уларнинг фикрича, кичкинтойлар бу каби ўйинчоқ билан ўйнаганда қаршисидаги рақибини отиш учун масофани ҳисобга олмайди. Айнан шу сабаб ҳам оддий сув сепадиган ўйинчоқли пистолетлар жароҳатланишга сабаб бўлади. Мутахассислар шуни инобатга олган ҳолда тўпламда ҳимояловчи кўзойнакни сотиб олишни ва мунтазам равишда болага ўйнашидан аввал хавфсизлик қоидаларини тушунтиришни маслаҳат беради.
Учадиган ўйинчоқлар
Вертолёт, самолёт, дрон ва бошқа учадиган аппаратлар ўсмирлар учун мўлжалланган. Қолган болаларга бу каби каби ўйинчоқлардан ота-онасининг кузатувисиз фойдаланиш мумкин эмас. Боланинг билмаган ҳолда қўлини ҳаракатланаётган паррак орасига қўйиши, шикастланиш ва жароҳатга сабаб бўлиши мумкин. Бундай ўйинчоқ харид қилишга қарор қилганларга эса ҳаракатланадиган қисми юмшоқ пластикдан ишланган, қирралари йўқ вариантларга эътибор қаратиш тавсия қилинади.
Полимерли шарчалар
Аксарият ҳолларда ривожлантириш учун мўлжалланган ўйинчоқлар тўпламида полимерли шарчалардан фойдаланилганига гувоҳ бўлиш мумкин. Аммо бу бола учун хавфли ҳисобланади. Агар кичкинтой қуруқ ҳолида ютиб юборса, кичкина шарча катталашиб, ичаклардан овқат ўтмай қолишига олиб келади, рентгенда эса уни аниқлаб бўлмайди. Шу сабаб ҳам бола катталар кузатувисиз полимерли шарчалар билан ўйнамаслиги керак.
Юмшоқ ўйинчоқлар
Чанг тўпланиши мумкинлиги ҳисобига бу каби ўйинчоқлар аллергия келиб чиқишига сабаб бўлади. Чанг фақат юзанинг ўзида бўлмагани туфайли эса уларни тозалаш унчалик осон бўлмайди. Бундан ташқари, арзон юмшоқ ўйинчоқлар токсик материаллардан ишланган, ранг бериш учун эса зарарли бўёқлардан фойдаланилган бўлиши мумкин. Бола мустаҳкам бўлмаган вариантдаги ўйинчоқларнинг кўз ёки бурнини юлиб олиб, оғзига солиши бундан ҳам ёмони, билмаган ҳолда ютиб юбориши мумкин.
Изоҳ (0)