Лиам Ҳемсворт, Дэниэл Редклифф ва суратга олиш майдончасидаги бошқа актёрлар билан боғлиқ кулгили воқеалар (фото)

Суратга олиш жараёнида юзлаб ижодкорлар иштирок этиши, уларнинг бири бўлмаса бошқаси билан боғлиқ қизиқарли ва ажойиб ҳодисалар юз бериши мумкин.

Лиам Ҳемсворт

«Ҳаёт мамот ўйинлари» фильми Лиам Ҳемсворт ва Женнифер Лоуренсга машҳурлик олиб келган. Суратга олиш жараёни жуда ҳам қизиқ кечган, актёрлар бир-бири билан ҳазиллашишдан чарчамаган. Тасвирга олиш жараёнидаги танаффуслардан бирида Ҳемсворт Лоуренсни сохта ўлик мурдаси билан қўрқитган. Актрисанинг ҳуши йўқолишига сал қолган. Бу кимнинг қилиғи эканини билганидан кейин Лиамнинг бошига мияси чайқаладиган даражада зарб билан урган. Токи юлдузларнинг ўзи айтиб бермагунича, бу воқеа бошқалар учун йўқ жойдан пайдо бўлган можародек туюлган.

Саймон Пегг

Саймон «Самовий йўл» сериали мотиви асосида суратга олинган фильмда суратга тушган. У иккинчи лентанинг тасвирга олиш жараёнида ҳамкасблари билан ҳазиллашишга қарор қилган. Актёр Крис Пайне ва Бенедикт Камбербитчга суратга олиш майдончасидаги муҳит соғлиқ учун хавфли эканини ва ундан сақланиш учун юзга «ионли крем» суртиш кераклигини айтган. Шунингдек, у нурларни йўқ қилиш учун бармоқларни тўлқинсимон ҳаракатлантириш кераклигини ҳам қўшимча қилган. Бундан ташқари, Бенедиктга имзолаш учун сохта шартнома берган, аммо Камбербитч ҳужжатни тайинли ўқиб чиқмаган. Кейинроқ актёрлар Саймоннинг ҳазиллашганини билиб қолган ва ундан аламини олишга ҳаракат қилмаган. Юлдузлар ҳозиргача ионли юз кремини эсдан чиқармаган.

Эмили Блант

Британиялик актриса «Ўзгарувчан ҳақиқат» фильмида профессионал раққоса Элиза ролини гавдалантирган. Баъзи саҳналарда балериналарнинг оёқ кийимини кийиб рақсга тушишига тўғри келган. Бундай тажрибаси бўлмаган, ҳаммасини суратга олиш майдончасида ўрганган актриса жараёнда бир неча марта йиқилгани ва оёғини қайириб олганини таъкидлаган.

Алан Рикман

Гарри Поттер ҳақидаги фильмда профессор Северус Снегг ролини ижро қилган актёр Алан Рикман учинчи қисмни суратга олиш жараёнида Дэниэл билан ҳазиллашмоқчи бўлган. У Албус Дамблдор ролини гавдалантирган актёр Майкл Гембон билан бирга Редклиффнинг сумкасига ғалати товуш чиқарадиган машина солиб қўйган. Тонгда Редклифф уйғонишидан аввал эса машинани қайтиб олган. Актёрлар қилмишларини дарров тан олмаган.

«Ярқираган эгар» фильмидаги нотаниш йигит

Режиссёр Мел Брукс томонидан 1974 йилда суратга олинган «Ярқираган эгар» фильмининг финалида ҳам жуда қизиқ воқеа содир бўлган. Сюжетга кўра актёрлар бир йўналишда гала бўлиб югураётган пайтда қарама-қарши тарафдан нотаниш йигит юриб келган. Кейинчалик унинг бу ерда фильм суратга олинаётганидан бехабар экани маълум бўлган. Яхши чиққан саҳнани қайта тасвирга олишни истамаган режиссёр йигитга суратга тушиш учун келишув имзолашни таклиф қилган.

Тони Хейл

«Доунсон кўрфази» сериалининг суратга олиш жараёнида Тони билан боғлиқ қизиқ воқеа содир бўлган. Унга Виржиния штатида суратга олинаётган эпизодда рол ижро қилиш таклиф қилинган. Камералар қаршисида жуда ҳам қаттиқ ҳаяжонланган Хейл машҳур актёр Жеймс ван дер Бикни қалин пальтода кўриб ҳайратини яширмаган. Хаёлидагини айтиб юборганидан кейин уялганидан юзлари қизариб кетган. Бу ҳам етмаганидек ҳеч нима демасдан тасвирга олиш майдончасини югурганича тарк этган. Ушбу воқеадан кейин павильонда бир неча дақиқа давомида сукунат ҳукм сурган.

Зак Галифианакис

Зак комедия жанридаги ролларини қойиллатиб ўйнаш билан бирга, суратга олиш жараёнидаги хурмача қилиқлари билан ҳам яхши маълум. Тru Calling сериалини тарк этиш учун қўлидан келган ҳамма нарсани қилгани бунинг исботи. У режиссёрни ранжитадиган гапларни гапирган, сценарий муаллифлари билан олишган, актёрлар ва жамоа аъзоларини дилини оғритган. Оқибатда сериал тугатилган, иштирокчиларда эса ёқимсиз таассурот қолган. Бу ҳали ҳаммаси эмас, Бредли Купер билан бир лойиҳада иштирок этиш давомида уни ҳам асабини бузган. Бредли ёқтирган қизи билан хайрлашганини айтганида Зак бунга қайлиғининг Купер ижросидаги «Зулмат қутблари» фильмини томоша қилгани сабаб эмасми, деб савол берган.