Ижтимоий тармоқларда Россияга ишга борган бир гуруҳ ўзбекистонлик меҳнат мигрантларининг уларга ваъда қилинган ойлик маошлари берилмаётгани ҳақидаги мурожаати юзасидан Ташқи меҳнат миграцияси агентлиги маълумот берди.
Маълум қилинишича, Ташқи меҳнат миграцияси агентлиги ва Россиянинг «Южний» агрокомбинати ўртасида қишлоқ хўжалигида ишлаш учун 400 нафар фуқарони танлов асосида ушбу корхонага жалб қилиш бўйича келишувга эришилган. Келишувда 33 минг рублдан 50 минг рублгача ойлик маоши кўзда тутилган бўлиб, фуқароларнинг йўлкира, ҳужжатларни расмийлаштириш харажатлари кейинчалик уларнинг иш ҳақидан ушлаб қолиш шарти билан корхона ҳисобидан тўлаб берилиши, агар бир йил давомида ишласа, корхона томонидан қопланиши белгиланган.
Ташқи меҳнат миграцияси агентлиги Андижон вилояти филиали томонидан ушбу корхонанинг ишончли вакили иштирокида 2021 йилнинг 16 июнь куни ўтказилган танловда танлаб олинган фуқароларнинг 63 нафари 23 июнь, 22 нафари 29 июнь, 16 нафари 4 июль, 42 нафари 5 июль кунлари Черкесск шаҳридаги «Южний» агрокомбинатида ишлаш учун жўнаб кетган.
Корхонага етиб борган ўзбекистоликнинг яшаш ва меҳнат шароитлари ҳамда паспортларининг иш берувчи томонидан олиб қўйилгани юзасидан қилган мурожаатига асосан вазиятни ўрганиш мақсадида 2021 йилнинг 14—16 июль кунлари Ташқи меҳнат миграцияси агентлиги ишчи гуруҳининг ушбу корхонага хизмат сафари ташкил этилган.
Ишчи гуруҳ томонидан ўрганишлар ва иш берувчилар билан олиб борилган музокаралар натижасида фуқароларнинг яшаш ва меҳнат шароитларини яхшилаш, ойлик маошларини ўз вақтида бериш ҳамда ҳужжатларни расмийлаштириш жараёнларини тезлаштириш бўйича келишув далолатномаси расмийлаштирилди.
Шунингдек, маълум бўлишича, ижтимоий тармоқларда тарқалган видеомурожаат ушбу корхонада ишловчи фуқаролар ўртасида бўлиб ўтган ўзаро суҳбат жараёнида бир соатга тўланадиган иш ҳақини бир кунга берилади, деб нотўғри тушуниш оқибатида 2021 йилнинг 15 июль куни, яъни ушбу фуқаролар иш бошлаган биринчи куни ёзиб олинган.
Бундан аввал Ташқи миграция агентлиги Москвада муҳожирлар оммавий муштлашувида ўзбекистонликлар иштирок этмаганини маълум қилгани, «Россия темир йўллари» компаниясига Ўзбекистондан ишчилар жалб этилиши ҳамда Россияда икки оёғидан айрилиб, хотирасини қисман йўқотган аёл Ўзбекистонга қайтарилгани ҳақида хабар берилганди.
Изоҳ (0)