Тунис президенти Каис Саид мамлакатда бўлиб ўтган норозилик намойишлари фонида бош вазир Хишам Машиши истеъфога чиқишини ва Халқ вакиллари ассамблеяси — бир палатали парламентнинг фаолияти тўхтатилишини эълон қилди. Депутатлар ҳам дахлсизлик ҳуқуқидан маҳрум этилди, деб ёзади Al Arabiya.

Тунис президенти Каис Саид

Фото: Reuters

Давлат раҳбари таъкидлашича, ҳозирча ҳукуматни унинг ўзи бошқаради. «Мен бир неча ой олдин қабул қилишим керак бўлган қарорни қабул қилдим: парламентнинг барча функцияларини тўхтатдим. Мамлакат конституцияси парламентни тарқатишга йўл қўймайди, лекин унинг фаолиятини музлатиб қўйишни тақиқламайди», — дея қўшимча қилди президент.

Президент қароридан бир неча соат ўтиб, Тунис парламенти биносига ҳарбий техника етиб келди ва уни ўраб олди. Бино ташқарисида йиғилган аҳоли ҳарбий техниканинг келишини қизғин ҳайқириқлар билан, шунингдек, давлат мадҳиясини куйлаб кутиб олди.

Тунис парламенти спикери, «Ан-Наҳда» (Уйғониш) партияси раҳбари Рашид Ганнуши Саидни давлат тўнтаришига уринишда айблади.

Туниснинг Tunisie Numerique нашри ахборотга эга манбага асосланиб хабар беришича, давлат раҳбари спикерга, шунингдек, суд ишлари олиб борилаётган бошқа 64 нафар депутатга мамлакатдан чиқиб кетишни тақиқлаган, бош вазир эса ҳукуматдаги қароргоҳини тарк этган ва номаълум томонга олиб кетилган.

Нашрнинг ёзишича, президент гвардияси бошлиғи Халед Яхяуи мамлакат ички ишлар вазирлигининг вақтинчалик раҳбари этиб тайинланган.

25 июль куни пойтахт ва бошқа йирик шаҳарларда минглаб тунисликлар норозилик билдириб кўчаларга чиқди. Намойишчилар парламентни тарқатиб юбориш ва муддатидан олдин сайловлар ўтказишни, шунингдек, мамлакатдаги вазиятнинг ёмонлашувига сабаб бўлганларни жавобгарликка тортишни талаб қилди. Улар ижтимоий ва иқтисодий ислоҳотларни амалга оширишга чақирди. Намойишчилар 2011 йилдан бери ҳукуматни бошқариб келаётган ҳукмрон «Ан-Наҳда» партиясининг сиёсатига қарши. Бир нечта шаҳарларда улар «Ан-Наҳда» партиясининг штаб-квартирасига ҳам ҳужум қилди. Акциялар Тунис мустақиллигининг 64 йиллигига бағишланди.

Тунисдаги норозилик намойишлари иқтисодий инқироз ва коронавирус тарқалишига қарши чоралардан норозилик фонида бўлиб ўтмоқда.

Тунис коронавирусдан ўлим даражасининг юқорилиги бўйича дунёда етакчи  ўринлардан бирида турибди. Ўтган ҳафта Тунис президенти мамлакатдаги коронавирус ҳолатини «ҳалокатли» деб атаб, инқирозни бошқариш армия зиммасига ўтишини эълон қилди. Шу билан бирга, у вазиятдан сиёсий мақсадларда фойдаланишга бўлган уринишлардан норози эканини билдириб, бош вазир ва парламент спикери ўртасидаги доимий можаро фонида «фуқароларнинг соғлиғи товар эмас»лигини таъкидлади. Бироқ Саиднинг ўзи ҳам Рашид Ганнуши ва Хишам ал-Мешиши билан анча-мунча муаммога дуч келган. Январь ойи ўрталарида бош вазир томонидан амалга оширилган ўзгаришларни президент ҳалигача тасдиқламаган.