Tunis prezidenti bosh vazirni iste’foga chiqarib, parlamentni tarqatib yubordi. Parlament binosiga harbiy texnika tortib kelindi

Tunis prezidenti Kais Said mamlakatda bo‘lib o‘tgan norozilik namoyishlari fonida bosh vazir Xisham Mashishi iste’foga chiqishini va Xalq vakillari assambleyasi — bir palatali parlamentning faoliyati to‘xtatilishini e’lon qildi. Deputatlar ham daxlsizlik huquqidan mahrum etildi, deb yozadi Al Arabiya.

Davlat rahbari ta’kidlashicha, hozircha hukumatni uning o‘zi boshqaradi. “Men bir necha oy oldin qabul qilishim kerak bo‘lgan qarorni qabul qildim: parlamentning barcha funksiyalarini to‘xtatdim. Mamlakat konstitutsiyasi parlamentni tarqatishga yo‘l qo‘ymaydi, lekin uning faoliyatini muzlatib qo‘yishni taqiqlamaydi”, — deya qo‘shimcha qildi prezident.

Prezident qaroridan bir necha soat o‘tib, Tunis parlamenti binosiga harbiy texnika yetib keldi va uni o‘rab oldi. Bino tashqarisida yig‘ilgan aholi harbiy texnikaning kelishini qizg‘in hayqiriqlar bilan, shuningdek, davlat madhiyasini kuylab kutib oldi.

Tunis parlamenti spikeri, “An-Nahda” (Uyg‘onish) partiyasi rahbari Rashid Gannushi Saidni davlat to‘ntarishiga urinishda aybladi.

Tunisning Tunisie Numerique nashri axborotga ega manbaga asoslanib xabar berishicha, davlat rahbari spikerga, shuningdek, sud ishlari olib borilayotgan boshqa 64 nafar deputatga mamlakatdan chiqib ketishni taqiqlagan, bosh vazir esa hukumatdagi qarorgohini tark etgan va noma’lum tomonga olib ketilgan.

Nashrning yozishicha, prezident gvardiyasi boshlig‘i Xaled Yaxyaui mamlakat ichki ishlar vazirligining vaqtinchalik rahbari etib tayinlangan.

25-iyul kuni poytaxt va boshqa yirik shaharlarda minglab tunisliklar norozilik bildirib ko‘chalarga chiqdi. Namoyishchilar parlamentni tarqatib yuborish va muddatidan oldin saylovlar o‘tkazishni, shuningdek, mamlakatdagi vaziyatning yomonlashuviga sabab bo‘lganlarni javobgarlikka tortishni talab qildi. Ular ijtimoiy va iqtisodiy islohotlarni amalga oshirishga chaqirdi. Namoyishchilar 2011-yildan beri hukumatni boshqarib kelayotgan hukmron “An-Nahda” partiyasining siyosatiga qarshi. Bir nechta shaharlarda ular “An-Nahda” partiyasining shtab-kvartirasiga ham hujum qildi. Aksiyalar Tunis mustaqilligining 64 yilligiga bag‘ishlandi.

Tunisdagi norozilik namoyishlari iqtisodiy inqiroz va koronavirus tarqalishiga qarshi choralardan norozilik fonida bo‘lib o‘tmoqda.

Tunis koronavirusdan o‘lim darajasining yuqoriligi bo‘yicha dunyoda yetakchi  o‘rinlardan birida turibdi. O‘tgan hafta Tunis prezidenti mamlakatdagi koronavirus holatini “halokatli” deb atab, inqirozni boshqarish armiya zimmasiga o‘tishini e’lon qildi. Shu bilan birga, u vaziyatdan siyosiy maqsadlarda foydalanishga bo‘lgan urinishlardan norozi ekanini bildirib, bosh vazir va parlament spikeri o‘rtasidagi doimiy mojaro fonida “fuqarolarning sog‘lig‘i tovar emas”ligini ta’kidladi. Biroq Saidning o‘zi ham Rashid Gannushi va Xisham al-Meshishi bilan ancha-muncha muammoga duch kelgan. Yanvar oyi o‘rtalarida bosh vazir tomonidan amalga oshirilgan o‘zgarishlarni prezident haligacha tasdiqlamagan.