Қашқадарё вилоятининг Касби туманида фаолият юритувчи ҳоким Тўхтамурод Мейлиев бугунги кунда қайси тоифадаги раҳбарлар матбуотдан қочишига ойдинлик киритди, дея хабар берди «Дарё» мухбири.
Таъкидланишича, Касби тумани ҳокими Тўхтамурод Мейлиев 2021 йилнинг 19 июль куни Қарши шаҳридаги Журналистлар уйида журналист ва блогерлар билан мулоқот қилиб, уларни қизиқтирган саволларга жавоб берган.
«Бугунги кунда қайси раҳбар матбуотдан қочади, қачонки ўзига билдирилган ишончни оқламаган, ишламаган раҳбар бўлса, у матбуотдан — журналист ва блогерлардан қочади. Улар билан юзма-юз келолмайди», — деди туман ҳокими Тўхтамурод Мейлиев.
Касби тумани ҳокими фаолияти давомида барча журналист ва блогерлар билан ҳамкорлик қилишга тайёрлигини айтиб, ҳар куни эрталаб барча ОАВда чиққан хабарларни имкон қадар кузатиб, қайси соҳа ёзилганини ўқишини маълум қилди.
Ҳоким ОАВ вакиллари билан мулоқоти давомида вилоятда ҳокимлик матбуот котибларининг қай даражада эркин эканлигига тўхталиб, матбуот котиби фаолияти ҳақида ҳам сўзлаб берган.
«Матбуот котиб раҳбарнинг сояси бўлиши керак. Бугунги кунда ҳар хил ахборот хуружлари бор. Уларга муносиб жавоб бериш учун раҳбар ва матбуот котибининг фикри бир жойдан чиқиши, улар маслаҳатлашган ҳолда иш кўриши керак. Шунингдек, матбуот котиби раҳбар билан хоҳлаган вақтида мулоқотга киришиб, юзага келган муаммо юзасидан раҳбар қарашини жамоатчиликка билдириши лозим», — деди Касби тумани ҳокими.
Ҳокимнинг қўшимча қилишича, у матбуот котибига барча имкониятларни яратиб берган ва эркин ишлаши учун барча ҳуқуқларни ҳам берган.
Мавзуга доир:
Изоҳ (0)