МИБнинг Қашқадарё вилояти бошқармаси 2021 йилнинг ўтган олти ойи давомида қоидабузар ҳайдовчилардан 6 миллиард 700 миллион сўм ундирди. Бу ҳақда «Дарё»га бошқарма ахборот хизмати раҳбари Гулноза Дилмуродова маълум қилди.
«Биргина, июнь ойида ўтказилган рейд давомида маъмурий жарималарни муддатида тўламаган транспорт воситаси ҳайдовчилари замонавий ускуна Autocon ёрдамида аниқланиб, 4 минг 646 ҳуқуқбузардан 1 миллиард 200 миллион сўм қарздорлик ундирилди. 300 дан зиёд ҳайдовчилар жаримани тўламагани учун улар бошқарувидаги транспорт воситалари жарима майдонига жойлаштирилди», — дейди Гулноза Дилмуродова.Қайд этилишича, МИБ вилоят бошқармаси вилоят ИИБ ЙҲХБ ходимлари билан ҳамкорликда вилоятнинг барча ҳудудларида йўл ҳаракати қоидаларига амал қилмаган, транспорт воситаларидан фойдаланиш жараёнида ҳуқуқбузарлик содир этган ва жарималарни белгиланган муддатда тўламай келаётган ҳайдовчиларга нисбатан тадбирлар ўтказган.
«Бюронинг вилоят бошқармаси органлари иш юритувига ИИБ ЙҲХБнинг вилоят бошқармаси томонидан 40 минг 764 та жами 10 миллиард 100 миллион сўмлик ижро ҳужжатлари келиб тушган бўлиб, жорий йилнинг ўтган олти ойи давомида жами 25 минг 989 та 6 миллиард 700 миллион сўмлик ижро ҳужжатлари таъминланишига эришилган», — дейди бошқарма ахборот хизмати раҳбари.
Бошқарма масъуллари айни кунда вилоятда бундай тадбирлар давом этаётганини айтиб, ҳайдовчиларга йўл қўйилган қоидабузарлик учун жарималарни 60 кундан кечикмай тўлаш кераклигини эслатмоқда.
Изоҳ (0)