Қашқадарё вилоятининг Шаҳрисабз туманидаги Кўл қишлоғига сел келди. Бу ҳақда «Дарё»га хабар берган туман ҳокимлиги ахборот хизмати раҳбари Баҳодир Ҳалимовнинг айтишича, сел келиши оқибатида қишлоққа олиб кирувчи йўл 10 соат давомида ёпилиб қолган.

Фото: Баҳодир Ҳалимов

«Бугун (2021 йилнинг 20 июль куни назарда тутилмоқда - таҳ.) тонг азонлаб туманнинг тоғли ҳудудларида кучли ёмғир ва дўл ёғди. Натижада тўпланиб қолган майда тош зарраларининг сел тошқинида оқиб келиши Кўл қишлоғига олиб борадиган йўлнинг ҳолатига зарар етказди. Ҳамда йўлда қатнов тўхтатилди. Вазиятдан хабар топган туман ҳокимлиги зарурий техникалар ва ёқилғи маҳсулотларини воқеа жойига юборди», — дейди ҳокимлик ахборот хизмати раҳбари Баҳодир Ҳалимов.

Фото: Баҳодир Ҳалимов

Таъкидланишича, селдан талафот кўрган йўлни таъмирлаш ишлари бугун, соат 15:00 га қадар давом этган. Унга қадар озиқ-овқатга эҳтиёж сезган фуқароларга озиқ-овқат маҳсулотлари ҳам топширилган.

Фото: Баҳодир Ҳалимов

«Соат 15:00 да вазият барқарорлашиб, йўл ҳолати яхшиланди ва автомобиль қатнови тикланди», — дейди ҳокимлик масъули.

Фото: Баҳодир Ҳалимов

Эслатиб ўтамиз, Қўл қишлоғи Шаҳрисабз тумани марказидан 86 километр узоқликда жойлашган бўлиб, қишлоқда қиш ойида икки метргача қор ёғиши кузатилади. Оқибатда эса қишлоққа олиб кирувчи ягона йўл 10 кунлаб ёпилиб қолиш эҳтимоли бор.

Фото: Баҳодир Ҳалимов