Ўзбекистонга яна 1 млн доза ўзбек-хитой вакцинаси олиб келинди

20 июль куни Ўзбекистонга Хитойдан яна 1 миллион доза хитой-ўзбек ҳаммуаллифлигида яратилган ZF-UZ-VAC2001 вакцинасининг навбатдаги партияси келтирилди. Бу ҳақда Telegram’даги «Vaksina.uz» канали хабар берди.

Бу ушбу вакцинанинг Ўзбекистонга келтирилган 8-партияси бўлиб, худди шунча миқдорда 30 июнь куни ҳам келтирилган эди. Бундан аввал ZF-UZ-VAC2001 нинг:

• 27 мартда — 1 миллион доза,
• 27 апрелда — 1 миллион доза,
• 18 майда — 1 миллион доза,
• 19 майда — 500 минг доза,
• 10 июнда — 1 миллион доза,
• 29 июнда — 1 миллион доза партиялари келтирилган.

Эслатиб ўтамиз, 16 июль куни AstraZeneca вакцинасининг 50 минг дозаси Ўзбекистонга олиб келинган эди. Шундай қилиб, Ўзбекистонда жами вакцина захираси 8 миллион 580 минг дозага етди. Ҳозиргача қўлланилган вакциналар сони 5,8 миллион дозадан ошган.