Покистоннинг шимоли-шарқида йўловчи автобуси юк машинаси билан тўқнашиб кетди. Оқибатда камида 27 киши ҳалок бўлди, 30 дан ортиқ киши жароҳат олди, деб ёзмоқда «Korrespondent.net».
Хабарга кўра, ҳодиса Панжоб вилоятининг Дера-Гази-Хон туманида содир бўлган. Тезликни ҳаддан ташқари оширган автобус айланма йўлда юк машинасига урилиб кетган. Воқеа жойига зудлик билан қутқарувчилар етиб келган ва жабрланганларни яқин атрофдаги касалхонага етказишган.
Таъкидланишича, Покистонда йўл ҳаракати билан боғлиқ бахтсиз ҳодисалар тез-тез содир этилади. Бунга асосан, йўлларнинг ёмонлиги, транспорт воситаларининг талабга жавоб бермаслиги ва уларни нопрофессионаллик билан бошқариш сабаб бўлади.
Аввалроқ Покистон шарқида микроавтобус каналга қулаб тушиб, оқибатда 11 киши, жумладан, етти нафар бола ҳалок бўлгани ҳақида хабар берилганди.
Шунингдек, АҚШдаги сирпанчиқ трассада 130 га яқин машина тўқнашиб, 6 киши ҳалок бўлгани, Ганада автобуслар тўқнашуви оқибатида 17 нафар одам ҳалок бўлгани ҳамда Камерунда юк машинаси ва автобус иштирокидаги ЙТҲда 50 дан ортиқ одам ёниб кетгани ҳақида хабар берилганди.
Изоҳ (0)