Ўзбекистонда вакцина олиш учун яратилган имкониятлардан икки баравар паст даражада фойдаланилмоқда. «Gazeta.uz»нинг маълум қилишича, бу ҳақда 14 июль куни «Тараққиёт стратегияси» марказида бўлиб ўтган Ўзбекистонда коронавирусга қарши профилактик эмлаш (вакцинация) жараёни ҳақида давра суҳбатида Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков айтиб ўтди.
Унинг сўзларига кўра, эмлаш жараёнлари бошлангунига қадар 1 та марказий, 14 та ҳудудий, 236 та туман ва шаҳарларда вакциналарни сақлайдиган алоҳида омборхоналар қурилди. 457 та совиткич, 148 та электрогенератор, 500 та термосумка ва 121 та термоконтейнер харид қилиниб, эмлаш пунктларига тақдим этилди. Республика бўйича 3184 та эмлаш пунктлари ва 862 та ҳаракатдаги (мобил) эмлаш бригадалари ташкил этилди. Вакциналарни қабул қилиш, сақлаш ва жойларга етказиш жараёнида фойдаланиш учун 17 та авторефрижератор, Минивен автобазаси негизида 206 та юк ташувчи музлаткичли автомашина, 16 та енгил автомобиль харид қилиниб, жойларга етказиб берилди.
Бундан ташқари, 13 июль ҳолатига Ўзбекистонда 4 миллион 160 минг дона шприслар жойларга етказилди. 45 минг 606 дона хавфсиз қутилар, 8,2 тонна пахта ва 6 тоннадан ортиқ 70 фоизли спиртлар жойларга олиб борилди.
Нурмат Отабековнинг таъкидлашича, Республикада эмлаш тадбирларини амалга ошириш учун 4356 нафар шифокор ва 11 минг 539 нафар ўрта тиббиёт ходимлари тайёргарликдан ўтказилган. Яна қўшимча эҳтиёж бўлиш эҳтимолидан келиб чиқиб, 833 нафар врачлар қўшимча тайёрланди.
«Эмлаш пунктларида ҳар куни ўртача 140 минг одам эмланяпти. Минг афсуски, биз ҳозир эмлаш тадбирлари учун яратилган имкониятларнинг тенг ярмидан фойдаланмоқдамиз. Агар биз бутун Ўзбекистонда мавжуд эмлаш бригадалари ва эмлаш пунктлари имкониятини сарҳисоб қиладиган бўлсак, ҳар биттасига 44 та эмланганлар тўғри келяпти. Агар биз эмлаш бригадаларини ҳам қўшиб ҳисоблайдиган бўлсак, ҳар биттасида 36 тадан одам 1 кунда эмланмоқда. Аслида, биз режа қилган пайтимизда ҳар битта эмлаш пункти ва эмлаш бригадасида бир кунда 70 тадан одамни эмлаш белгиланган эди. Демак, биз имкониятдан 2 баравар паст даражада (фойдаланмоқдамиз). Вакцинадан бошқа биз эпидемик вазиятни барқарорлаштирадиган бир таклифни ёки қандайдир ташаббусни кўрмаяпмиз», — деган у.«Вакцинация жараёнларида фаол иштирок этаётган тиббиёт ходимларига рағбат сифатида уларни моддий қувватлаш механизмларини ҳам амалиётга татбиқ этадиган бўлсак, биз бундан фақат манфаат кўрамиз», — дея қўшимча қилган Санитария-эпидемиологик осойишталик ва жамоат саломатлиги хизмати бошлиғи ўринбосари.
Соғлиқни сақлаш вазирлиги маълумотларига кўра, 13 июлга келиб Ўзбекистонда коронавирусга қарши қўлланилган вакциналар сони 5,1 млн дозадан ошди. Уларнинг 1 453 556 дозаси иккинчи ва 517 950 дозаси учинчи босқичда қўлланилган. Мамлакатда жами эмланганлар сони 3 158 120 кишини ташкил этмоқда.
Мавзуга доир:
Изоҳ (0)