Жонс Ҳопкинс университети маълумотларига кўра, дунёда коронавирусга чалинганлар сони 187 803 426 кишига етди, шуларнинг 4 048 968 нафари вафот этган. Касалланганлар сони бўйича АҚШ (33,9 миллион), Ҳиндистон (30,9 миллион), Бразилия (19,1 миллион), Франция (5,8 миллион) ва Россия (5,7 миллион) энг олдинда бормоқда.
Пекин
Фото: AP Photo
Биринчи марта Ҳиндистонда аниқланган дельта штамми камида 111 та мамлакат ва ҳудудларда қайд этилган. Жаҳон соғлиқни сақлаш ташкилоти (ЖССТ) маълумотлари шундан дарак бермоқда.
Коронавируснинг бошқа штаммлари бўйича жаҳон статистикаси қуйидагича кўринишда: альфа-штамм («британча») 178 та; бета вариант («жанубий африкача») — 123 та; гамма штамми («бразилияча») эса 75 та мамлакат ва ҳудудларда аниқланган.
ЖССТ маълум қилишича, сўнгги бир ҳафта ичида (5—11 июль) дунёда коронавирусга чалиниш бўйича янги ҳолатлар ўтган ҳафтага нисбатан 10 фоизга кўпайиши кузатилган. Ҳафталик кўрсаткич 2 996 465 кишига етди. Бутун дунёда касалланиш даражаси ўсди, ҳар куни ўртача 400 мингдан ортиқ кўрсаткич қайд этилди (ўтган ҳафта бу кўрсаткич 370 мингтага тенг эди). Ўлимлар сони 3 фоизга ошиб, 55 830 тани ташкил қилди.
АҚШда сўнгги уч ҳафта ичида коронавирус юқтириш ҳолатлари икки мартадан кўпроқ ошди.
Расмий ҳисоб-китобларга кўра, мамлакатда ҳар куни ўртача 23 минг киши COVID-19’га чалинмоқда, уч ҳафта аввал бу кўрсаткич кунига ўртача 11,3 мингдан ошмасди.
Энг кўп касалланиш ҳолатлари аҳолини эмлаш жараёни секинроқ кетаётган штатларда кузатилмоқда. Бундан ташқари, ўсишга мамлакатда дельта штаммининг тарқалиши ҳам туртки бўлмоқда.
Шу билан бирга, касалланиш бўйича умумий статистика ўтган қишдагига нисбатан анча паст кўрсаткичларни ташкил қилмоқда, ўшанда кунлик юқтириш ҳолатлари 240 мингдан ошмасди.
Москвада «Спутник V» вакцинаси 12-17 ёшли ўсмирларда синовдан ўтказилмоқда. Ўсмирларни коронавирусга қарши эмлаш 20 сентябргача бошланиши керак.
Синов 5 июль куни бошланди, 100 нафар бола унда иштирок этмоқда, 6 июль куни уларнинг 21 нафари вакцинанинг биринчи дозасини олди.
Гамалея номидаги марказ раҳбари Александр Гинсбург болаларнинг икки нафарида 37 даража тана ҳарорати қайд этилганини ва бу нормал реакция эканини айтди. Мутахассис Россияда ўсмирлар учун вакцинация 20 сентябрга келиб бошланишини маълум қилди.
«Биз бундан муваффақиятли ўтмоқчимиз, ҳозирча бунинг учун бор имкониятимизни ишга соляпмиз. Охирги пайтларда касалликни аввалгидан кўра оғирроқ ўтказаётган ўсмирлар сони ошди. Уларни ҳимоя қилиш керак», — дея қўшиб қўйди Гинсбург.
Нидерландия бош вазири Марк Рютте мамлакатдаги аксарият коронавирус чекловларининг барвақт бекор қилингани юзасидан узр сўради.
Сиёсатчининг бундай баёнот беришига қиролликда COVID-19 қайтадан авж олгани сабаб бўлди. Бор-йўғи икки ҳафтада вирусга чалинганлар сони тўққиз мингга етди, бу мамлакатда бир йил ичидаги энг катта кўрсаткичдир.
«Биз имкони бор деб ўйлаган нарса амалда иложсиз бўлиб чиқди. Биз бемулоҳаза иш тутдик, бундан афсусдамиз ва узр сўраймиз»,— деди сиёсатчи.
Айнан зиёфатлар ва тунги клублар, ҳукуматнинг фикрича, касалликнинг авж олишига сабабчи бўлган. Бир кеча-кундузда Нидерландияда 8522 кишида коронавирус аниқланган.
Марокашда COVID-19’га қарши икки дозада эмланган 9 миллион кишининг 0,03 фоизигина коронавирусга чалинган.
Хусусий шифокор мутахассислар миллий касаба уюшмалари коллегияси президенти, қироллик Вакцинация илмий қўмитаси аъзоси Мулай Саид Афиф маълум қилишича, 9 миллион кишидан 3400 нафари вирусни юқтириб олган. Шуларнинг 98 фоизи касалликни енгил шаклда ўтказган. Жиддий ҳолатлар улуши минималга тенг», — деди у.
«Жиддий ҳолатлар ва ўлимлар статистикаси умид уйғотади. Бу Марокашдаги эпидемиологик вазият назорат остидалигини билдиради. Шу билан бирга, янги штаммларнинг тарқалиши ҳам хавотир уйғотади… Вакцинация — пандемияга якун ясашнинг ягона йўли», — деди Афиф.
Мавзуга доир: Марокашда аҳолини COVID-19’га қарши эмлаш бошланди
