Jons Hopkins universiteti ma’lumotlariga ko‘ra, dunyoda 184 611 115 kishi koronavirusni yuqtirib olgan, shularning 3 993 159 nafari vafot etgan. Kasallanish holatlarining ko‘pligi bo‘yicha AQSh (33,7 million), Hindiston (30,6 million), Braziliya (18,8 million), Fransiya (5,8 million) va Rossiya (5,5 million) barcha davlatlar ichida yetakchilik qilmoqda.
Jons Hopkins universiteti bergan axborotga qaraganda, 3,2 milliarddan ortiq dozada vaksinalar qo‘llanilgan. Har bitta doza alohida odamlarga kiritilgan deb hisoblansa, bu sayyoradagi voyaga yetgan aholining qariyb 50 foiziga teng bo‘ladi. 3,2 milliard odam kamida bitta doza bilan emlangan bo‘lsa, ularning 885 millioni to‘liq emlangan.
Ayni paytgacha 13 ta mamlakat va oltita kichik hududlar o‘z aholisining 50 foizdan ortig‘ini COVID-19’ga qarshi to‘liq emlashga muvaffaq bo‘lgan, bular Seyshel orollari, Isroil, Mo‘g‘iliston, Bahrayn, Chili, Malta, Buyuk Britaniya, AQSh, Vengriya, Islandiya, Urugvay, Qatar, BAA davlatlari, shuningdek, Bermuda orollari, Aruba, Sint-Marten, Angilya, Men oroli va Kuk orollaridir.
Xitoy va Rossiya mutaxassislari koronavirusga qarshi yangi vaksina ustida hamkorlikdagi ishlarni yakunladi.“Ishlar Sankt-Peterburgda olib borildi, ular muvaffaqiyatli kechdi. Endi undan foydalanish uchun Rossiya tegishli organlarining ruxsati kerak”, — dedi Xitoyning Rossiyadagi elchisi Chjan Xanxuey.
Shuningdek, u Xitoy va Rossiya koronavirusga qarshi kurash bo‘yicha hamkorlikni kengaytirayotganini qayd etdi. Xususan, Rossiyaning “Sputnik V” vaksinasini Xitoyda ishlab chiqarishni kengaytirish tashabbusi Si Szinpin va Putin tomonidan ma’qullangan.
Mavzuga doir: O‘zbek–xitoy vaksinasining koronavirusning “hindcha” shtammiga qarshi ta’siri o‘rganilmoqda
Moskva Sog‘liqni saqlash departamenti bosh pediatri Ismoil Osmanovning so‘zlariga ko‘ra, vaksina olganlarning barchasi o‘zlarini yaxshi his qilmoqda, ularda asoratlar kuzatilmayapti.
“Sputnik V”ni 12—17 yoshlilarda sinovdan o‘tkazish jarayonida 100 nafar ko‘ngilli qatnashmoqda. Tadqiqot Moskvadagi ikkita bolalar tibbiyot muassasasi bazasida olib borilmoqda.
Shuningdek:- Jahon sog‘liqni saqlash tashkiloti (JSST) koronavirusga qarshi kurashda erishilgan progressga qaramasdan, ayni paytda COVID-19 pandemiyasi juda xavfli bosqichda turganini ma’lum qildi. Bu vaziyatdan chiqishning yagona yo‘li — individual himoya vositalari, testlar, dorilar va vaksinalarni odilona taqsimlash borasida mamlakatlarni qo‘llab-quvvatlash.
- Portugaliyada koronavirus pandemiyasining to‘rtinchi to‘lqini boshlandi, deya ma’lum qildi bosh vazir Antoniu Koshta. Uning aytishicha, mamlakatda vaksinatsiya jarayoni faol bormoqda va u yanada tezlashtiriladi. Aholining 52 foizi bitta doza bilan, 32 foizi to‘liq emlangan.
- Hindistonda minglab odamlar vaksina o‘rniga fizrastvor (fiziologik eritma) bilan emlandi. Soxta vaksinalar savdosiga tibbiyot xodimlari ham aralashgan. Oqibatda qariyb 2500 kishi soxta vaksina olgan, firibgarlar esa bundan 28 ming dollar ishlab olgan.
Izoh (0)