Сурхондарё вилояти Соғлиқни сақлаш бошқармаси махсус ва тез тиббий ёрдам автохўжалиги томонидан июль ойида камида бешта Damas-2 D13 (1, 2, 3, 4, 5) русумидаги махсус автомашиналарини харид қилиш бўйича шартномалар имзолади. Бунга Telegram’даги «Давлетовуз» канали эътибор қаратди.
Маълум қилинишича, ҳар бир Damas бюджетга 76 миллион 242 минг сўмдан тушган. Вилоят ҳокими қарори билан маҳаллий бюджетдан Термиз шаҳар ҳокимлигига хизмат машинасини сотиб олиш учун 245 миллион сўм маблағ ажратилган.
Эслатиб ўтамиз, соғлиқни сақлаш вазирининг биринчи ўринбосари Амрилло Иноятов 2020 йилнинг охирида Damas русумидаги автомобилларни тиббиёт соҳаси учун харид қилиш тўхтатилганини маълум қилган эди.
Республика шошилинч тез тиббий ёрдам илмий маркази бош директори Даврон Тўлаганов эса «шошилинч тиббий ёрдамни ривожлантиришнинг долзарб вазифаси — Damas русумли автомашиналардан босқичма-босқич воз кечиш ҳамда уларни B ва S классидаги тиббий транспорт воситаларига алмаштириш» эканлигини таъкидлаган.
«Агар 2016 йилда тез ёрдам хизмати автоулов паркининг асоси Damas автомобилларидан ташкил топган бўлса, ҳозирги кунда тиббий асбоб-ускуналар билан тўлиқ жиҳозланган B ва S классига мансуб реанимобиллар сони 549 тага етди. Яқин кунларда барча Damas автомашиналари 1000 дона B классига мансуб замонавий машиналар сотиб олиниши ҳисобига алмаштирилади», — деган эди Тўлаганов.
Маълумот учун, 2019 йил ноябрь ойи маълумотларига кўра, мамлакатда 2500 га яқин тез тиббий ёрдам машиналари бўлиб, улардан 2217 таси Damas автомобиллари эди. Ўша вақтда соғлиқни сақлаш вазири ўринбосари (ҳозирда шу вазирлик раҳбари) бўлган Абдуҳаким Ҳожибоев 2021 йилгача Damas микровенлари базасидаги барча тез тиббий ёрдам машиналари замонавий реанимобилларга алмаштирилишини маълум қилган эди.
Эслатиб ўтамиз, 2021 йилнинг январида ҳам Сурхондарёда тез ёрдам хизматига 20 та Damas топширилганди.
Изоҳ (0)