Афғонистон президенти Ашраф Ғани ва Покистон бош вазири Имрон Хон ташриф билан 15—16 июль кунлари Ўзбекистонда бўлади. Бу ҳақда 12 июль, душанба куни ўтказилган брифингда Президент матбуот котиби Шерзод Асадов сўз юритди, дея хабар бермоқда «Дарё» мухбири.
Таъкидланишича, Покистон етакчиси расмий ташриф билан, Афғонистон раҳбари эса Тошкент шаҳрида ўтказиладиган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция доирасида амалий ташриф билан келмоқда.
«Ушбу конференция, шубҳасиз, жорий ҳафтанинг энг муҳим тадбири бўлади. Аввал қайд этилганидек, Афғонистон ва Покистон президентлари, шунингдек, Европа иттифоқининг ташқи ишлар ва хавфсизлик сиёсати бўйича олий вакили, Еврокомиссия вице-президенти Жозеп Боррел, 20 дан зиёд мамлакат ташқи ишлар вазирлари, нуфузли халқаро ва минтақавий ташкилотлар раҳбарлари иштирок этиши кутилмоқда. Иштирокчиларнинг умумий сони 600 дан ортиқ.
Президент Шавкат Мирзиёев ташаббуси билан ўтказилаётган конференция Марказий ва Жанубий Осиё давлатлари ўртасидаги дўстона алоқалар, ишонч ва яхши қўшничилик муносабатларини мустаҳкамлашга қаратилган», — деди Асадов.
Унинг қайд эцҳича, халқаро тадбирда БМТ бош котиби Антониу Гутерриш иштирокчиларга видеомурожаат йўллайди.
«Ялпи ва шўъба мажлисларида минтақавий боғлиқликни янада чуқурлаштириш имкониятлари, шу жумладан, савдо ва транспорт соҳаларидаги ҳамкорликнинг барқарор ўсишни таъминлашдаги ўрни, маданий-гуманитар алоқаларни қайта тиклаш орқали дўстлик ва ўзаро ишончни мустаҳкамлаш, минтақавий хавфсизлик соҳасидаги таҳдид ва хатарлар муҳокама қилинади.
Бундан ташқари, давлат раҳбари Афғонистон ва Покистон президентлари, Хитой, Россия, Ҳиндистон, Саудия Арабистони, Туркия, Бангладеш, Марказий Осиё давлатлари ва бошқа мамлакатлар ташқи ишлар вазирлари, шунингдек, АҚШ президентининг Ички хавфсизлик масалалари бўйича маслаҳатчиси Элизабет Шервуд-Рендалл ва Европа Иттифоқи ташқи сиёсий идораси раҳбари Жозеп Боррел билан икки томонлама учрашувлар ўтказиши режалаштирилган», — деди давлат раҳбари матбуот котиби.
Бундан ташқари, жорий ҳафта Шавкат Мирзиёев раислигида қатор ҳудудларда насос станцияларини модернизация қилиш юзасидан йиғилиш ҳам ўтказилади.
Изоҳ (0)