Наманган шаҳаридаги уйлардан бирида ёнғин чиқиб, учта қўшнининг уйига ҳам зарар етди. Бу ҳақда вилоят ФВБ матбуот хизмати хабар берди.
Фото: Наманган вилояти ФВБ матбуот хизмати
Маълум қилинишича, ёнғин 12 июль куни соат 17:13 да Наманган шаҳар «Шарқ тонги» МФЙ 2-ўтиш йўли Тошкент кўчасидаги уйда содир бўлган. Оқибатда уйнинг шифт ва том қисмидан 35 квадрат метр жойи ҳамда уй-рўзғор буюмлари ёниб зарарланган.
Бундан ташқари, ушбу уйга қўшни уйнинг том қисмидан 50 квадрат метр жойи ҳамда уй-рўзғор буюмлари, ҳужжатлари, яна бир қўшни — «Бўстон» МФЙ 2-ўтиш йўли Тошкент кўчаси 4-берк 2-уйда яшовчи фуқаронинг яшаш уйининг том қисмидан 10 квадрат метр жойи ва 2А уйда яшовчи фуқаронинг яшаш уйининг шифт ва том қисмидан 25 квадрат метр жойи ҳамда уй-рўзғор буюмлари, ҳужжатлари ёниб зарарланган.
Ёнғин соат 18:15 да ўчирилган, натижада ёнғин қутқарув гуруҳлари томонидан 200 квадрат метр жой сақлаб қолинган.
Хабарда айтилишича, айни пайтда ёнғин келиб чиқиш сабаби ва зарар миқдорлари ўрганилмоқда.
