Сўнгги йилларда Хитойдаги ижтимоий тармоқларда қишлоқ хўжалиги билан боғлиқ контент катта суръатларда машҳурликка эришмоқда. Douyin (TikTok’нинг маҳаллий муқобили) платформасининг блогер фермерлари бир йил ичида 15 баравар кўп пул топа бошлади, деб хабар беради Esquire.
Фермерлар ва қишлоқ хўжалиги маҳсулотларини етказиб берувчилар алоҳида провинцияларда ўз маҳсулотларини шаҳардаги истеъмолчиларга тўғридан-тўғри трансляция ва кичик видеороликлар ёрдамида сотмоқда. Douyin’да бу каби блогерлар сони ортиб бормоқда. 2021 йилнинг март ҳолатига кўра, 10 мингдан ортиқ обуначиси бўлган фермерлар сони ўтган йилга нисбатан олти бараварга ошган.
2018 йилда Сзин Гоуэй исмли фермер Лицзян кўчаларидаги туристларга мевалар сотиш билан шуғулланган ва қарзга ботиб кетган. Бугунги кунда у интернет-сенсация: Gouey Brother Pomegranate номли канал юритади — унинг 7,3 миллион обуначиси бўлиб, 2020 йил давомида у 46 миллион долларга яқин пул ишлаб топган. Бир сафар у 20 дақиқа ичида 925 минг доллар ишлаб топишга муваффақ бўлган.
«Қишлоқдаги энг қийин ишлар ҳам қизиқарли визуал контент манбаи бўла олади. Бу шаҳар аҳолисига етмаётган нарса ва улар буни томоша қилишни истайди», — дейди Сзин Гоуэй.
Го Ченчен исмли фермернинг эса 2,5 миллион обуначиси бор. У ўз роликларида ҳосиллари — мини ошқовоқлардан тортиб, ёввойи шафтолиларгача маълумот беради. Авваллари Ченчен WeChat’даги Tencent Holdings Ltd. дастури орқали савдо қилган ва кунига юзга яқин буюртмаларни қабул қилган. Ҳозирда эса битта тўғридан-тўғри трансляциянинг ўзида 50 минггача буюртма олиб, ойига 1,38 миллион доллардан ортиқ пул ишлайди.
Bloomberg’нинг таъкидлашича, қишлоқ хўжалиги 23 миллиондан ортиқ ишчи ўз уйларини тарк эта олмаган, етказиб беришлар «музлаган» коронавирус пандемияси вақтида оммалашган, шу сабабли фермерлар ўз маҳсулотини сотишнинг янги усулини қидиришга тушган. Шу билан бирга, шаҳарликлар ҳам ўз уйларидан ташқарига чиқа олмай қолган ва кўпроқ овқат қилишни бошлаган. Натижада интернетда янги сабзавотларга бўлган талаб кескин ошган.
Экспертларнинг фикрича, кўплаб шаҳар аҳолиси нафақат фермерларнинг маҳсулотларига ишонади, балки улар табиатни қўмсайди, шу сабабли бу турдаги контентни томоша қилади.
Изоҳ (0)