Самарқанд вилоятида биринчи электр қувватлаш бекати пайдо бўлди. Бу ҳақда PlugShare маълумотларига таяниб, Spot хабар берди.

Таъкидланишича, бу Megawatt компаниясининг GB-T DC 30KWt қувватлаш қурилмасидир. Бекат Булунғур туманида жойлашган.

Ўзбекистондаги биринчи электр зарядловчи қурилмалар Фарғонада, кейин Тошкент шаҳри ва Тошкент вилоятида пайдо бўлди. Улар хусусий компаниялар томонидан турли мақсадлар учун ўрнатилмоқда:

• Makro супермаркетлари атрофида электр зарядлаш тармоғини қурмоқда;
• TokBor компанияларга зарядлаш ўрнатиш хизматларини таклиф этади;
• Megawatt электр транспорт воситалари сотувчиси сифатида инфратузилмани барпо этмоқда.

Ҳозирга келиб, PlugShare хариталарида аллақачон 23 та зарядловчи қурилмалар кўрсатилган. Бир йил олдин уларнинг сони 3 та эди.

Эслатиб ўтамиз, Ўзбекистонда 2021 йилнинг январь—май ойларида импорт қилинган электромобиллар учун 4,6 миллион АҚШ доллари сарфланган. Таъкидлаш керакки, Ўзбекистонда электромобиллар импорти учун имтиёзлар амалда — улар учун бож ва акциз солиғи тўланмайди. Фақатгина тегишли йиғимлар ва ҚҚС тўланади.

Аввалроқ Ўзбекистондаги бир нечта компаниялар 2021—2023 йилларда автомобиллар, пикаплар, юк машиналари, микроавтобуслар ва бошқа автомобилларни ишлаб чиқариш ва йиғишни йўлга қўймоқчи эканлиги ҳақида хабар берилган эди. Президент йилига 50-60 минг дона ҳамёнбоп автомобиллар ва электромобиллар ишлаб чиқаришни йўлга қўйиб, автомобиль саноати учун сармоя киритиш зарурлигини таъкидлаган эди.