Филиппин жанубида юк ташувчи ҳарбий самолёт қулаб тушиши оқибатида ҳалок бўлганлар сони камида 45 кишига етди. Бу ҳақда мамлакат Мудофаа вазирлигига таяниб «РБК» хабар берди.

Аввалроқ вазирлик расмий вакили генерал-майор Уильям Гонзалес ҳалокат жойидан 29 кишининг жасади топилганини маълум қилганди. Яна 17 киши бедарак йўқолган деб ҳисобланилмоқда, 50 киши касалхонага ётқизилган.

Айни вақтда Гонзалес қайд этишича, қутқарувчилар бошқа омон қолганларни ҳам топишга умид қилмоқда. «Бу жуда қайғули кун бўлди, лекин умидларимизни узиб қўймаслигимиз керак», — дея қўшиб қўйди Мудофаа вазирлиги вакили.

Аввалроқ ҳукумат фалокат оқибатида камида 17 киши ҳалок бўлгани, 40 киши касалхонага ётқизилганини хабар қилганди.

Филиппин Қуролли Кучларининг C-130 Hercules самолёти Сулу провинциясидаги Холо оролида қўнишга киришиш чоғида ҳалокатга учради. Самолёт минтақада терроризмга қарши кураш учун ҳарбий хизматчиларни оролга олиб учган. Мудофаа вазирлиги маълумотларига қараганда, бортда 92 киши, шу жумладан, саккиз нафар экипаж аъзоси, шунингдек, бешта жанговар машина ҳам бўлган.

Фалокат жойида ёнғин бошланди, у ерга дарҳол фавқулодда хизматлар етиб келди. Ҳарбийлар маҳаллий экстремистларга қарши аксилтеррорчилик операциясида қатнашиш учун Холога парвоз қилаётган эди. Мудофаа вазирлиги авиаҳалокатнинг террорчилар ҳужумлари билан боғлиқ эмаслигини бошидан таъкидлаб ўтганди. Шу билан бирга, айни пайтда муассаса ҳодиса сабабларини ўрганиш билан эмас, балки қутқарув операцияси билан банд экани қайд этилди.